ଉପରାଷ୍ଟ୍ରପତିଙ୍କ ବୟାନକୁ ନେଇ ବର୍ଷିଲେ ବିରୋଧୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଜାତିର ପିତା ମହାତ୍ମାଗାନ୍ଧିଙ୍କ ଉପରେ ବୟାନ ଦେଇ ବିବାଦ ମଧ୍ୟକୁ ଆସିଯାଇଛନ୍ତି ଉପରାଷ୍ଟ୍ରପତି ଜଗଦୀପ ଧନଖର । ଏହି ମାମଲାକୁ ଲଜ୍ଜାଜନକ କହିବା ସହ କଂଗ୍ରେସ ସମେତ ବିରୋଧୀମାନେ ଏବେ ଉପରାଷ୍ଟ୍ରପତିଙ୍କ ଉପରେ ବର୍ଷିଛନ୍ତି । ଚାଟୁକାରିତା କରିବାର ଏକ ସୀମା ଅଛି । ମାତ୍ର ଶ୍ରୀ ଧନଖର ତାହାକୁ ପାର କରିଯାଇଛନ୍ତି ବୋଲି କଂଗ୍ରେସ ନେତା ମନିକମ ଟାଗୋର କହିଛନ୍ତି ।ଜୈନ ଗୁରୁ ଓ ଦାର୍ଶନିକ ରାମଚନ୍ଦ୍ରଜୀଙ୍କୁ ସମର୍ପିତ ଉଦ୍ଦେଶ୍ୟରେ ଆୟୋଜିତ ଏକ କାର୍ଯ୍ୟକ୍ରମକୁ ସମ୍ବୋଧିତ କରି ଶ୍ରୀ ଧନଖର କହିଥିଲେ, ‘ମୁଁ ଆପଣଙ୍କୁ ଗୋଟିଏ କଥା କହିବାକୁ ଚାହୁଁଛି, ମହାତ୍ମାଗାନ୍ଧି ବିତିଯାଇଥିବା ଶତାବ୍ଦୀର ମହାପୁରୁଷ ଥିଲେ । ନରେନ୍ଦ୍ର ମୋଦୀ ଚଳିତ ଶତାବ୍ଦୀର ଯୁଗପୁରୁଷ ଅଟନ୍ତି । ଗାନ୍ଧି ସତ୍ୟ ଓ ଅହିଂସା ବଳରେ ବ୍ରିଟିଶଙ୍କ ଗୁଲାମରୁ ଦେଶକୁ ସ୍ୱାଧିନ କରିଥିଲେ । ମୋଦୀ ପ୍ରଗତି ମାର୍ଗରେ ଆମକୁ ଆଗକୁ ବଢ଼ାଉଛନ୍ତି । ମୋଦୀ ଓ ଗାନ୍ଧି ନୁହେଁ ଶ୍ରୀମଦ ରାମଚନ୍ଦ୍ରଜୀଙ୍କର ଶିକ୍ଷାକୁ ଦର୍ଶାଉଛନ୍ତି ।