ସର୍ବ ଭାରତୀୟ ପୋଲିସ୍‍ ଡିଜି ସମ୍ମିଳନୀରେ ଯୋଗଦେବେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ  ନରେନ୍ଦ୍ର ମୋଦୀ ନୂଆଦିଲ୍ଲୀ ସ୍ଥିତ ଜାତୀୟ କୃଷି ବିଜ୍ଞାନ ସୌଧ, ପୁଷା, ଠାରେ ଅନୁଷ୍ଠିତ ସର୍ବ ଭାରତୀୟ ପୋଲିସ୍ ଡାଇରେକ୍ଟର ଜେନେରାଲ / ଇନ୍ସପେକ୍ଟର ଜେନେରାଲ୍ ସମ୍ମିଳନୀରେ ଯୋଗଦେବେ ।

 ତିନି ଦିନିଆ ସମ୍ମିଳନୀ ହାଇବ୍ରିଡ୍ ଫର୍ମାଟରେ ଅନୁଷ୍ଠିତ ହେବ । ରାଜ୍ୟ / କେନ୍ଦ୍ରଶାସିତ ଅଞ୍ଚଳର ଡିଜିପି ଏବଂ କେନ୍ଦ୍ରୀୟ ସଶସ୍ତ୍ର ପୋଲିସ୍ ଫୋର୍ସ ଏବଂ କେନ୍ଦ୍ରୀୟ ପୋଲିସ୍ ସଂଗଠନର ମୁଖ୍ୟଙ୍କ ସମେତ ପ୍ରାୟ ୧୦୦ ନିମନ୍ତ୍ରିତ ବ୍ୟକ୍ତି ଏହି ସମ୍ମିଳନୀରେ ଯୋଗଦେବେ, ଅବଶିଷ୍ଟ ନିମନ୍ତ୍ରଣକାରୀମାନେ ଦେଶର ବିଭିନ୍ନ ସ୍ଥାନରୁ ଭର୍ଚୁଆଲରେ ଅଂଶଗ୍ରହଣ କରିବେ ।

ଏହି ସମ୍ମିଳନୀରେ ସାଇବର ଅପରାଧ, ପୋଲିସ ବ୍ୟବସ୍ଥାରେ ଜ୍ଞାନକୌଶଳ, ଆତଙ୍କବାଦ ମୁକାବିଲା, ବାମ ପନ୍ଥୀ ଉଗ୍ରବାଦ, ଦକ୍ଷତା ବୃଦ୍ଧି, ଜେଲ ସଂସ୍କାର ସମେତ ବିଭିନ୍ନ ପ୍ରସଙ୍ଗ ଉପରେ ଆଲୋଚନା ହେବ । ଚିହ୍ନିତ ବିଷୟବସ୍ତୁ ଉପରେ ଜିଲ୍ଲା, ରାଜ୍ୟ ତଥା ଜାତୀୟ ସ୍ତରର ପୋଲିସ୍ ଏବଂ ଗୁଇନ୍ଦା ଅଧିକାରୀଙ୍କ ସହ ଏହି ସମ୍ମିଳନୀରେ ବ୍ୟାପକ ଆଲୋଚନା କରାଯିବ । ପ୍ରତ୍ୟେକ ବିଷୟବସ୍ତୁ ଅନ୍ତର୍ଗତ ରାଜ୍ୟ / କେନ୍ଦ୍ରଶାସିତ ଅଞ୍ଚଳରୁ ସର୍ବୋତ୍ତମ ଅଭ୍ୟାସ ସମ୍ମିଳନୀରେ ଉପସ୍ଥାପିତ ହେବ ଯାହା ଦ୍ୱାରା ରାଜ୍ୟମାନେ ପରସ୍ପରଠାରୁ ଶିଖିପାରିବେ ।

୨୦୧୪ ପରଠାରୁ ଡିଜିପି ସମ୍ମିଳନୀ ପ୍ରତି ପ୍ରଧାନମନ୍ତ୍ରୀ ଆଗ୍ରହ ପ୍ରକାଶ କରୁଛନ୍ତି । ପୂର୍ବରୁ ପ୍ରଧାନମନ୍ତ୍ରୀଙ୍କ ସାଙ୍କେତିକ ଉପସ୍ଥିତି ପରିବର୍ତ୍ତେ ସେ ସମ୍ମିଳନୀର ସମସ୍ତ ପ୍ରମୁଖ ଅଧିବେଶନରେ ବସୁଛନ୍ତି । ପ୍ରଧାନମନ୍ତ୍ରୀ କେବଳ ସମସ୍ତ ଆଲୋଚନାକୁ ଧୈର୍ଯ୍ୟର ସହ ଶୁଣନ୍ତି ନାହିଁ, ବରଂ ମୁକ୍ତ ଏବଂ ଅନୌପଚାରିକ ଆଲୋଚନାକୁ ମଧ୍ୟ ଉତ୍ସାହିତ କରନ୍ତି ଯାହା ଦ୍ୱାରା ନୂତନ ଚିନ୍ତାଧାରା ଆସିପାରିବ । ଦେଶର ସର୍ବୋଚ୍ଚ ପୋଲିସ୍ ଅଧିକାରୀଙ୍କ ପାଇଁ ଏହା ଏକ ମହତ୍ୱପୂର୍ଣ୍ଣ ବାତାବରଣ ଯୋଗାଇଥାଏ ଯାହା ଦେଶକୁ ପ୍ରଭାବିତ କରୁଥିବା ପ୍ରମୁଖ ପୋଲିସ୍ ବ୍ୟବସ୍ଥା ଏବଂ ଆଭ୍ୟନ୍ତରୀଣ ସୁରକ୍ଷା ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କୁ ସିଧାସଳଖ ଅବଗତ କରାଇବା ଏବଂ ସେମାନଙ୍କର ଖୋଲା ଏବଂ ମୁକ୍ତ ସୁପାରିଶ କରିବା ।

ଆହୁରି ମଧ୍ୟ, ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣ ଅନୁଯାୟୀ ପରିଚାଳିତ ଏହି ସମ୍ମିଳନୀରେ କେବଳ ସୁରକ୍ଷାକୁ ସୁନିଶ୍ଚିତ କରିବା ପାଇଁ ନୁହେଁ, ବରଂ ଉପୁଜୁଥିବା ସମସ୍ୟା ଏବଂ ଆହ୍ୱାନର ମୁକାବିଲା ପାଇଁ ଦକ୍ଷତା ବିକାଶ ଲାଗି ପୋଲିସ୍ ଏବଂ ସୁରକ୍ଷା କ୍ଷେତ୍ରରେ ଭବିଷ୍ୟତବାଦୀ ବିଷୟବସ୍ତୁ ଉପରେ ଆଲୋଚନା ଆରମ୍ଭ ହୋଇଛି ।