ପ୍ରଧାନମନ୍ତ୍ରୀ, ଗୃହମନ୍ତ୍ରୀ ଅଜିତ ପାୱାରଙ୍କ ଅନ୍ତିମ ସଂସ୍କାରରେ ଯୋଗଦେବେ

ମୁମ୍ବାଇ: ମହାରାଷ୍ଟ୍ର ରାଜନୀତିର ହେଭିୱେଟ୍ ନେତା ତଥା ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ଏକ ମର୍ମନ୍ତୁଦ ବିମାନ ଦୁର୍ଘଟଣାରେ ମୃତ୍ୟୁ ଘଟିଛି। ଆଜି ସକାଳ ୧୧ଟାରେ ତାଙ୍କ ପୈତୃକ ଗ୍ରାମ ବାରାମତିରେ ଅନ୍ତିମ ସଂସ୍କାର କରାଯିବ। ଏହି ଦୁଃଖଦ ଘଟଣା ସାରା ଦେଶରେ ଶୋକର ଲହରୀ ଖେଳାଇ ଦେଇଛି।  ଗତକାଲି ସକାଳ ୮:୪୫ ସମୟରେ ବାରାମତି ବିମାନବନ୍ଦରରେ ଅଜିତ ପାୱାରଙ୍କ ଚାର୍ଟର ବିମାନଟି ଅବତରଣ କରୁଥିବା ବେଳେ ଦୁର୍ଘଟଣାଗ୍ରସ୍ତ ହୋଇଥିଲା। ଅବତରଣ ସମୟରେ ବିମାନଟି ସମ୍ପୂର୍ଣ୍ଣ ଭାବେ କ୍ଷତିଗ୍ରସ୍ତ ହୋଇଯାଇଥିଲା। ଏହି ଭୟଙ୍କର ଦୁର୍ଘଟଣାରେ ଉପମୁଖ୍ୟମନ୍ତ୍ରୀଙ୍କ ସମେତ ବିମାନରେ ଥିବା ସମସ୍ତ ୬ ଜଣଙ୍କର ମୃତ୍ୟୁ ହୋଇଥିବା ନିଶ୍ଚିତ କରାଯାଇଛି। କୁହାଯାଉଛି ଯେ, ଏକ ନିର୍ବାଚନୀ ରାଲିରେ ଯୋଗ ଦେବା ପାଇଁ ସେ ବାରାମତି ଯାତ୍ରା କରୁଥିଲେ।  ପାୱାରଙ୍କ ଶେଷ ଦର୍ଶନ ପାଇଁ ବାରାମତିରେ ପ୍ରବଳ ଜନସମାଗମ ହୋଇଛି।  କେନ୍ଦ୍ର ଗୃହମନ୍ତ୍ରୀ ଅମିତ ଶାହ ବାରାମତି ଗସ୍ତ କରି ଅନ୍ତିମ ସଂସ୍କାରରେ ଯୋଗଦେବାର କାର୍ଯ୍ୟକ୍ରମ ରହିଛି।  ପ୍ରଧାନମନ୍ତ୍ରୀ ମୋଦୀ ମଧ୍ୟ ବାରାମତି ଆସି ଶ୍ରଦ୍ଧାଞ୍ଜଳି ଜ୍ଞାପନ କରିପାରନ୍ତି ବୋଲି ଚର୍ଚ୍ଚା ହେଉଛି।  ମହାରାଷ୍ଟ୍ର ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀ ପୂର୍ବରୁ ହିଁ ବାରାମତିରେ ପହଞ୍ଚି ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି। ଏହି ଦୁର୍ଘଟଣା ପଛରେ କୌଣସି ଷଡ଼ଯନ୍ତ୍ର କିମ୍ବା ବୈଷୟିକ ତ୍ରୁଟି ରହିଛି କି ନାହିଁ, ତାହାକୁ ନେଇ ପ୍ରଶ୍ନ ଉଠିଛି। ଏନସିପି (ଅଜିତ ଗୋଷ୍ଠୀ)ର ମୁଖପାତ୍ର ବ୍ରଜ ମୋହନ ଶ୍ରୀବାସ୍ତବ ଏହି ଦୁର୍ଘଟଣାର ନିରପେକ୍ଷ ତଦନ୍ତ ଦାବି କରିଛନ୍ତି। କଂଗ୍ରେସ ନେତା ନୀତିନ ରାଉତ ମଧ୍ୟ ଏହି ଘଟଣାର ଉଚ୍ଚସ୍ତରୀୟ ତଦନ୍ତ ପାଇଁ ଦାବି କରି କହିଛନ୍ତି ଯେ, ଏଭଳି ଦୁର୍ଘଟଣାକୁ ଗୁରୁତ୍ୱର ସହ ନିଆଯିବା ଉଚିତ।