ରବିବାର ସନ୍ଧ୍ୟାରେ ଶପଥ ନେବେ ମୋଦୀ

ଲଗାତାର ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିବେ। ଜବାହରଲାଲ ନେହରୁଙ୍କ ପରେ ଦ୍ୱିତୀୟ ଭାରତୀୟ ପ୍ରଧାନମନ୍ତ୍ରୀ ଭାବେ ମୋଦୀ କ୍ରମାଗତ ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ନେବାପାଇଁ ମଞ୍ଚ ପ୍ରସ୍ତୁତ କରାଯାଉଛି। ଶପଥ ଗ୍ରହଣ ସମାରୋହରେ ଅନେକ ଦକ୍ଷିଣ ଏସୀୟ ନେତାଙ୍କୁ ନିମନ୍ତ୍ରଣ କରାଯାଇଛି । ବାଂଲାଦେଶ ପ୍ରଧାନମନ୍ତ୍ରୀ ଶେଖ୍ ହସିନା ଏବଂ ଶ୍ରୀଲଙ୍କା ରାଷ୍ଟ୍ରପତି ରାନିଲ ବିକ୍ରମସିଂହେ ସେମାନଙ୍କ ଉପସ୍ଥିତି ନିଶ୍ଚିତ କରିସାରିଛନ୍ତି। ନେପାଳ ପ୍ରଧାନମନ୍ତ୍ରୀ ପୁଷ୍ପ କମଲ ଦହଲ ‘ପ୍ରଚଣ୍ଡ’, ଭୁଟାନ ପ୍ରଧାନମନ୍ତ୍ରୀ ସେରିଙ୍ଗ ତୋବଗେ ଏବଂ ମରିସସ୍ ପ୍ରଧାନମନ୍ତ୍ରୀ ପ୍ରବିନ୍ଦ ଜଗନ୍ନାଥଙ୍କୁ ମଧ୍ୟ ନିମନ୍ତ୍ରଣ ପଠାଯାଇଛି।୨୦୧୯ ଲୋକସଭା ନିର୍ବାଚନରେ ଏନ୍‌ଡିଏ ୩୫୨ଟି ଆସନରେ ବିଜୟୀ ହୋଇଥିବା ବେଳେ ୨୦୨୪ ନିର୍ବାଚନରେ ଏହା ୨୯୩କୁ ଖସି ଆସିଛି। ସଂଖ୍ୟାଗରିଷ୍ଠତା ସଂଖ୍ୟା ୨୭୨ ଉପରେ ଏନ୍‌ଡିଏ ରହିଥିବାରୁ ସରକାର ଗଠନରେ କୌଣସି ପ୍ରତିବନ୍ଧକ ନାହିଁ। ତେବେ ସରକାର ଗଠନ କରିବା ପାଇଁ ବିଜେପି ପାଖରେ ଆବଶ୍ୟକ ସଂଖ୍ୟା ନଥିବାରୁ ପ୍ରଧାନମନ୍ତ୍ରୀ ମୋଦୀ ସହଯୋଗୀ ଦଳ ଉପରେ ନିର୍ଭର କରୁଛନ୍ତି। ମୋଦୀ ୨୦୧୪ ପରଠାରୁ ଏହି ପରିସ୍ଥିତିର ସମ୍ମୁଖୀନ ହୋଇନଥିବା ବେଳେ ଏବେ ତାଙ୍କୁ ଚଳାଇବାକୁ ହେବ। ଅତୀତରେ କଂଗ୍ରେସ ସହ ମେଣ୍ଟ କରିଥିବା ଟିଡିପି ସୁପ୍ରିମୋ ଚନ୍ଦ୍ରବାବୁ ନାଇଡୁ ଏବଂ ଜେଡିୟୁ ସୁପ୍ରିମୋ ନୀତୀଶ କୁମାର ଏବେ ସେମାନଙ୍କ ସମର୍ଥନ ବଦଳରେ କେତେକ ଦାବି ରଖିଥିବା ଜଣାପଡିଛି। ବିଭିନ୍ନ ଶୀର୍ଷ ମନ୍ତ୍ରାଳୟ ଦାବି ସମେତ ସରକାର ପରିଚାଳନା ପାଇଁ ସର୍ତ୍ତ ମଧ୍ୟ ସେମାନେ ରଖିଛନ୍ତି। ମିଳିଥିବା ସୂଚନା ଅନୁଯାୟୀ, ମୋଦୀ ଜୁନ୍ ୮ରେ ଶପଥ ନେବାର ଥିଲା, କିନ୍ତୁ ଅତ୍ୟନ୍ତ ଶୁଭ ଯୋଗକୁ ଦୃଷ୍ଟିରେ ରଖି ଏହି ତାରିଖକୁ ବଦଳାଇ ଜୁନ୍ ୯ ରଖାଯାଇଛି। ଜ୍ୟୋତିଷ ଶାସ୍ତ୍ର ଅନୁସାରେ ଜୁନ୍ ୯, ୨୦୨୪, ଜ୍ୟେଷ୍ଠ ମାସ ଶୁକ୍ଳ ପକ୍ଷର ତୃତୀୟ ଦିନ ହେଉଛି ରବିବାର।