ବଦଳିଲା ଯୁକ୍ତ ଦୁଇ ପ୍ରଶ୍ନପତ୍ର
ଯେଉଁ ଛାତ୍ରଛାତ୍ରୀ ୨୦୨୩ରେ ପଞ୍ଜୀକୃତ କରିଥିବେ ଏବଂ ଆସନ୍ତାବର୍ଷ ଯୁକ୍ତ ଦୁଇ ପରୀକ୍ଷା ଦେବେ ସେମାନଙ୍କ ପାଇଁ ପ୍ରଶ୍ନପତ୍ର ଢାଞ୍ଚା ବଦଳିଛି । ଏହା ଅନୁଯାୟୀ, ବାର୍ଷିକ ପରୀକ୍ଷାରେ ଏଣିକି ଆଉ ୧୦୦ ମାର୍କ ନୁହେଁ, ୮୦ ମାର୍କର ଥିଓରୀ ପରୀକ୍ଷା ଦେବାକୁ ହେବ। ପାସ୍ ହେବାକୁ ହେଲେ, ୩୦ ପ୍ରତିଶତ ଅର୍ଥାତ୍ ୨୪ ମାର୍କ ରଖିବା ବାଧ୍ୟତାମୂଳକ । ବାକି ୨୦ ମାର୍କ ଇଣ୍ଟରନାଲ୍ ପରୀକ୍ଷା ହେବ ।ପରୀକ୍ଷାରେ ଜଣେ ଯେତେ ନମ୍ବର ରଖିବ, ତାହା ମୂଳ ନମ୍ବର ସହ ଯୋଡ଼ାଯାଇ ମୋଟ୍ ମାର୍କ ବୋଲି ଧରାଯିବ । ହେଲେ ଥିଓରି ମାର୍କ ସହ ଯୋଡାଯାଇ ତାକୁ ପାସ୍ ମାର୍କ ବୋଲି ଧରାଯିବ ନାହିଁ। ଉଦାରଣସ୍ୱରୁପ ଯଦି ଜଣେ ପରୀକ୍ଷାର୍ଥୀ ଇଣ୍ଟରନାଲରେ ୨୦ରୁ ୧୫ ମାର୍କ ପାଇଥିବେ, କିନ୍ତୁ ଥିଓରୀ ପରୀକ୍ଷାରେ ୮୦ରୁ ୧୯ ମାର୍କ ରଖିଥିବେ, ତେବେ ସେ ପାସ୍ କରିପାରିବେ ନାହିଁ । ଉଚ୍ଚ ମଧ୍ୟମିକ ଶିକ୍ଷା ପରିଷଦ ବା CHSE, CBSE ଭଳି ଜାତୀୟ ସ୍ତରୀୟ ବୋର୍ଡ ପରିକ୍ଷା ଢାଞ୍ଚାରେ ପରୀକ୍ଷା କରିବାକୁ ନିଷ୍ପତ୍ତି ନେଇଥିବାରୁ ଏଣିକି ଆଉ ମାତୃଭାଷା କିମ୍ବା ଇଂରାଜୀରେ ପିଲାଙ୍କୁ ରଚନା ଲେଖିବାକୁ ପଡିବନି । କିମ୍ବା ୧୦ ମାର୍କିଆ ଦୀର୍ଘ ଉତ୍ତରମୂଳକ ପ୍ରଶ୍ନ ବି ଆସିବନି । ନୂଆ ଢାଞ୍ଚାରେ ହେବାକୁ ଥିବା ପରୀକ୍ଷାରେ ଅତିକମରେ ୨୦ଟି ଏକ ମାର୍କିଆ MCQ ବାଧ୍ୟତାମୂଳକ । କୌଣସି ବିଷୟରେ ୧୦ମାର୍କ ବିଶିଷ୍ଟ ପ୍ରଶ୍ନ ରହିବନି । କଳା ବିଭାଗରେ ସର୍ବାଧିକ ୮ ମାର୍କିଆ ପ୍ରଶ୍ନ ରହିବ । ସେହିପରି ବାଣିଜ୍ୟ ଏବଂ ବିଜ୍ଞାନରେ ସର୍ବାଧିକ ୫ ମାର୍କ ବିଶିଷ୍ଟ ପ୍ରଶ୍ନ ରହିବ । ୨ ମାର୍କର ପ୍ରଶ୍ନର ଉତ୍ତର ୪୦ ରୁ ୫୦ ଶବ୍ଦ, ୩ ମାର୍କର ପ୍ରଶ୍ନର ଉତ୍ତର ୬୦ରୁ ୮୦ ଶବ୍ଦ, ୫ ମାର୍କ ପ୍ରଶ୍ନର ଉତ୍ତର ୧୨୦ରୁ ୧୫୦ ଏବଂ ୮ ମାର୍କ ପ୍ରଶ୍ନର ଉତ୍ତର ୩ଶହରୁ ୩ଶହ ୫୦ ଶବ୍ଦ ଭିତରେ ଜଣେ ଲେଖିପାରିବେ ।
