ଲକ୍ଷ୍ନୌ: ଭାରତୀୟ ସେନାର ମେଜର ଜେନେରାଲ ଆର୍ମି ସର୍ଭିସ କର୍ପ୍ସ (ଏମ୍ଜି ଏଏସ୍ସି) କମାଣ୍ଡ ହେଡକ୍ୱାର୍ଟର୍ସ ଲକ୍ଷ୍ନୌର ଇନ୍-ଚାର୍ଜ ମେଜର ଜେନେରାଲ ସୈୟଦ ତକି ଆବ୍ବାସ ରିଜଭୀ (୫୨) ଦୀର୍ଘଦିନର ରୋଗ ସହ ଲଢ଼ି ଶେଷ ନିଶ୍ୱାସ ତ୍ୟାଗ କରିଛନ୍ତି। ରିଜଭୀଙ୍କ ପରଲୋକ ପରେ ଗଭୀର ଶୋକ ପ୍ରକାଶ ପାଇଛି ।
ଗୋରଖପୁରର ବାସିନ୍ଦା ଥିବା ବରିଷ୍ଠ ଅଧିକାରୀ ରିଜଭୀ ଗତ ଦୁଇ ମାସ ଧରି କମାଣ୍ଡ ହସ୍ପିଟାଲ, ଲକ୍ଷ୍ନୌରେ ଚିକିତ୍ସିତ ହେଉଥିଲେ। ମେଜର ଜେନେରାଲ ରିଜଭୀ ଏକୁଟ ସିଭିୟର ନେକ୍ରୋଟାଇଜିଙ୍ଗ ପ୍ୟାଙ୍କ୍ରିଆଟାଇଟିସ୍ରେ ପୀଡ଼ିତ ଥିଲେ। ଏହା ଏକ ଅତ୍ୟନ୍ତ ବିପଦପୂର୍ଣ୍ଣ ରୋଗ ଯେଉଁଥିରେ ପ୍ୟାଙ୍କ୍ରିଆସ୍ ନିଜର ଟିସୁ ହଜମ କରିଦିଏ, ଯାହା ଫଳରେ ଗଭୀର ପ୍ରଦାହ, ଆଭ୍ୟନ୍ତରିଣ ରକ୍ତସ୍ରାବ ଓ ଅନେକ ସମୟରେ ବହୁ ଅଙ୍ଗ ବିଫଳ ହୋଇଯାଏ। ତାଙ୍କର ପାର୍ଥିବ ଦେହକୁ ତିରଙ୍ଗାରେ ଆଚ୍ଛାଦିତ କରି ଇମାମବାଡ଼ା ଗୁଫ୍ରାନ ମାଆବ୍ରେ ପୂର୍ଣ୍ଣ ସାମରିକ ସମ୍ମାନ ସହ ଅନ୍ତିମ ସଂସ୍କାର କରାଯାଇଛି। ସେନାର ଗାର୍ଡ ଅଫ୍ ଅନର ପ୍ରଦାନ କରାଯାଇଥିଲା।
ମେଜର ଜେନେରାଲ ରିଜଭୀଙ୍କ ପତ୍ନୀ ନିଶାତ ବାନୋ ରିଜଭୀ, ଝିଅ ଗୁଲ ଜେହ୍ରା ଏବଂ କିଶୋର ପୁଅ ଜରି ଆବ୍ବାସ ଅଛନ୍ତି । ତାଙ୍କ ସହ ଘନିଷ୍ଠ ଭାବେ ଜଣେ ବରିଷ୍ଠ ସେନା ଅଧିକାରୀ କହିଛନ୍ତି, ତାଙ୍କ ବିୟୋଗ ସେନା ଏବଂ ପରିବାର, ପରିଜନ ଙ୍କ ପାଇଁ ଅପୂରଣୀୟ କ୍ଷତି। ଆର୍ମି ସର୍ଭିସ କର୍ପ୍ସ ପରିବାର ଏବଂ ଲକ୍ଷ୍ନୌର ସମଗ୍ର ସାମରିକ ସମାଜ ଏହି ବୀର ଅଧିକାରୀଙ୍କ ଅକାଳ ବିୟୋଗରେ ଗଭୀର ଶୋକପ୍ରକାଶ କରିବା ସହ ସମବେଦନା ପ୍ରକାଶ କରିଛନ୍ତି ।