ବଜାରରେ ମହଙ୍ଗା ମାଡ଼

ଦେଶରେ ଲୋକସଭା ନିର୍ବାଚନ ସମେତ ୪ଟି ରାଜ୍ୟର ବିଧାନସଭା ନିର୍ବାଚନ ଫଳ ପ୍ରକାଶ ପାଇବା ପରେ କେନ୍ଦ୍ର ଓ ରାଜ୍ୟରେ ନୂଆ ସରକାର ଗଠନ ହୋଇସାରିଛି। ଏଭଳି ସ୍ଥିତିରେ ଗତ କିଛିଦିନ ମଧ୍ୟରେ ଦେଶରେ ଅଧିକାଂଶ ଖାଦ୍ୟ ସାମଗ୍ରୀର ଦର ବଢ଼ିଯାଇଛି। ଚାଉଳ ଠାରୁ ଆରମ୍ଭ କରି ଡାଲି, ତେଲ, ଅଟା, ସୁଜି, ମଇଦା ଆଦିର ଦାମ୍‌ ମହଙ୍ଗା ହୋଇଛି। ଆଳୁ, ପିଆଜ, ଅଦା, ରସୁଣ ସମେତ କଞ୍ଚା ପରିବା ମଧ୍ୟ ଏଥିରୁ ବାଦ୍‌ ପଡ଼ିନାହିଁ। ହରଡ଼ ଡାଲି ମୂଲ୍ୟ ଇତିମଧ୍ୟରେ ସର୍ବାଧିକ ବୃଦ୍ଧି ଘଟିଛି। ଗତ ମାସକ ମଧ୍ୟରେ କି‌ଲୋଗ୍ରାମ ପିଛା ୧୫ରୁ ୨୦ ଟଙ୍କା ବୃଦ୍ଧି ଘଟି ହରଡ଼ ଡାଲି ମୂଲ୍ୟ ପାଇକାରୀ ବଜାରରେ ୧୬୦ରୁ ୧୭୦ ଟଙ୍କା ସ୍ତରରେ ପହଞ୍ଚିଛି। ଏହାଫଳରେ ଖୁଚୁରା ବଜାରରେ ହରଡ଼ ଡାଲି ମଧ୍ୟ ୧୮୦ ଟଙ୍କା ଭଳି ଉଚ୍ଚସ୍ତରରେ ବିକ୍ରି ହେଉଛି। ସେହିଭଳି ବୁଟ ଡାଲି ମୂଲ୍ୟ କିଲୋଗ୍ରାମ ପିଛା ୭୪ ଟଙ୍କାରୁ ବୃଦ୍ଧି ପାଇ ୮୨ ଟଙ୍କା‌ ଛୁଇଁଛି। ବିରି ଡାଲି କିଲୋଗ୍ରାମ ପିଛା ୫ରୁ ୬ ଟଙ୍କା ବଢ଼ିଛି। ମସୁର ଡାଲି ୫ ଟଙ୍କା ବଢ଼ି ୭୫ ଟଙ୍କାରେ ପହଞ୍ଚିଛି।