ପନ୍ତଙ୍କ ପାଇଁ ଅଗ୍ନିପରୀକ୍ଷା
ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ କ୍ରିକେଟ ସିରିଜ ଭାରତର ଷ୍ଟାର ୱିକେଟକିପର ଓ ବ୍ୟାଟ୍ସମ୍ୟାନ ରିଷଭ ପନ୍ତଙ୍କ ପାଇଁ ଅଗ୍ନିପରୀକ୍ଷା ସଦୃଶ । ସେ ଏହି ସିରିଜ ମାଧ୍ୟମରେ ଦିିନିକିଆ ଦଳରେ ନିଜ ସ୍ଥାନ ସୁରକ୍ଷିତ ରଖିପାରିବେ । ଶୁଭମନ ଗିଲ ଓ ଶ୍ରେୟାଶ ଆୟାରଙ୍କ ଅନୁପସ୍ଥିତି ପନ୍ତଙ୍କ ପାଇଁ ବଡ ସୁଯୋଗ ସୃଷ୍ଟି କରିଛି ।
ଚାମ୍ପିୟନ୍ସ ଟ୍ରଫି ପରେ ପନ୍ତଙ୍କୁ ଭାରତୀୟ ଦିନିକିଆ ଦଳରେ ସାମିଲ କରାଯାଇଛି । ଟେଷ୍ଟ କ୍ରିକେଟରେ ପନ୍ତ ନିଜ ସ୍ଥାନ ସୁରକ୍ଷିତ ରଖିଥିବା ବେଳେ ଦିିନିକିଆ ଓ ଟି୨୦ରେ ତାଙ୍କ ସ୍ଥାନ ନିୟମିତ ହୋଇ ପାରୁନି । ଋଷଭ ପନ୍ତ ଏକ ଇନ୍ଷ୍ଟାଗ୍ରାମ୍ ପୋଷ୍ଟରେ ପ୍ରଶଂସକଙ୍କୁ କ୍ଷମା ମାଗିଛନ୍ତି। ପନ୍ତ ବ୍ୟକ୍ତିଗତ ଭାବେ ଏହି ଶୃଙ୍ଖଳାରେ ପୂରା ବିଫଳ ହୋଇଥିଲା ବେଳେ ୪ଟି ପାଳିରୁ ଅତ୍ୟନ୍ତ ନୈରାଶ୍ୟଜନକ ଭାବେ ୧୨.୨୫ ହାରରେ ୪୯ ରନ୍ କରିଛନ୍ତି।
ଶୁବମନ୍ ଗିଲ୍ଙ୍କ ଅନୁପସ୍ଥିତିରେ ତାଙ୍କ ନେତୃତ୍ବରେ ଭାରତୀୟ ଦଳ ଗୁଆହାଟୀ ଟେଷ୍ଟ୍କୁ ୪୦୮ ରନ୍ରେ ହାରିଥିଲା। ଯାହା ଘରୋଇ ପରିବେଶରେ ଭାରତର ସର୍ବବୃହତ୍ (ରନ୍ ବ୍ୟବଧାନରେ) ପରାଜୟ ଥିଲା। ଏଭଳି ଶୋଚନୀୟ ପ୍ରଦର୍ଶନ ପରେ ପ୍ରଶଂସକ ଭାରତୀୟ ଦଳକୁ ସାମାଜିକ ଗଣମାଧ୍ୟମରେ ଭୀଷଣ ଟ୍ରୋଲ୍ କରୁଛନ୍ତି। ପ୍ରଶିକ୍ଷକ ଗୌତମ ଗମ୍ଭୀର ସର୍ବାଧିକ ସମାଲୋଚନାର ଶିକାର ହେଉଥିଲା ବେଳେ ଖେଳାଳିମାନେ ମଧ୍ୟ ଏଥିରୁ ବର୍ତ୍ତି ନାହାନ୍ତି।
ପ୍ରଶଂସକଙ୍କ ମନର ଭାବନା ଓ ଦୁଃଖକୁ ବୁଝି ପାରି ପନ୍ତ ଗୁରୁବାର ପ୍ରକାଶ କରିଥିବା ଲମ୍ବା ଲେଖାରେ ଭାରତୀୟ ଦଳର ଏଭଳି ଅପ୍ରତ୍ୟାଶିତ ବିପର୍ଯ୍ୟୟ ଲାଗି ପଶ୍ଚାତାପ କରିଛନ୍ତି। ଗତ ଦୁଇ ସପ୍ତାହ ଭିତରେ ଭାରତୀୟ ଦଳ ଅତ୍ୟନ୍ତ ନିମ୍ନ ମାନର କ୍ରିକେଟ୍ ଖେଳିଥିବା କଥା ମଧ୍ୟ ସେ ଏଥିରେ ଖୋଲାଖୋଲି ଭାବେ ସ୍ବୀକାର କରିଛନ୍ତି। ଭାରତୀୟ ଦଳର ପ୍ରତିନିଧିତ୍ବ କରିବାକୁ ଜୀବନର ସବୁଠୁ ବଡ଼ ସମ୍ମାନ ଭାବେ ବର୍ଣ୍ଣନା କରିଥିବା ପନ୍ତ ଆଗାମୀ ସମୟରେ ଟିମ୍ ଇଣ୍ଡିଆ ଆହୁରି ଶକ୍ତିଶାଳୀ ହୋଇ ଫେରିବ ବୋଲି ଦୃଢ଼ ଆଶା ପୋଷଣ କରିଛନ୍ତି।