ବିହାର ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରସଙ୍ଗକୁ ନେଇ ସୁପ୍ରିମକୋର୍ଟରେ ନିର୍ବାଚନ କମିଶନଙ୍କ ସାନି ସତ୍ୟପାଠ ଦାଖଲ କରିଛନ୍ତି । ବ୍ୟକ୍ତିବିଶେଷଙ୍କୁ ନଜଣାଇ ଭୋଟର ତାଲିକାରୁ ତାଙ୍କ ନାମ ବାଦ୍ ପକାଯିବ ନାହିଁ ବୋଲି କହିଛନ୍ତି ଇସିଆଇ।
ଇସିଆଇ କହିଛନ୍ତି ତାଲିକାରୁ ବାଦ୍ ପଡିବା ସମ୍ପର୍କରେ ଅବଗତ କରାଯିବ । ଯୁକ୍ତି ରଖିବାର ସୁଯୋଗ ଦିଆଯିବ ବୋଲି କହିଛନ୍ତି କମିଶନ। ଗତ ଅଗଷ୍ଟ ୧ ତାରିଖରେ ପ୍ରକାଶିତ ଚିଠା ଭୋଟର ତାଲିକାରେ ବାଦ୍ ପଡିଥିବା ବ୍ୟକ୍ତିବିଶେଷଙ୍କୁ ଏସମ୍ପର୍କରେ ନୋଟିସ ଦିଆଯିବ। ତାଙ୍କୁ ଏସମ୍ପର୍କରେ ସମସ୍ତ ତଥ୍ୟାବଳୀ ଦାଖଲ କରିବାକୁ ସୁଯୋଗ ଦିଆଯିବ। ପରେ ଚୂଡ଼ାନ୍ତ ନିଷ୍ପତ୍ତି କର୍ତ୍ତୃପକ୍ଷ ନେବେ।
ଇସି କହିଛନ୍ତି ବିହାରର ୭ କୋଟି ୮୯ ଲକ୍ଷ ଭୋଟରଙ୍କ ମଧ୍ୟରୁ ବର୍ତ୍ତମାନ ସୁଦ୍ଧା ୭ କୋଟି ୨୪ ଲକ୍ଷ ଭୋଟର ସେମାନଙ୍କ ଉପଯୁକ୍ତ ଦସ୍ତାବିଜ ଦାଖଲ କରିସାରିଲେଣି। ଚିଠା ଭୋଟର ତାଲିକାର ନକଲ ସମସ୍ତ ରାଜନୈତିକ ଦଳଙ୍କୁ ଦିଆଯାଇଛି। ଆସନ୍ତା ଅକ୍ଟୋବର କିମ୍ବା ନଭେମ୍ବରରେ ୨୪୩ ଆସନ ବିଶିଷ୍ଟ ବିହାର ବିଧାନସଭା ନିର୍ବାଚନ ହେବା ଆଶା କରାଯାଉଛି।