ମହାରାଷ୍ଟ୍ରରେ ଦାଦା ପୁତୁରା ବିବାଦ
ଆଗାମୀ ମହାରାଷ୍ଟ୍ର ବିଧାନସଭା ନିର୍ବାଚନରେ ଅଜିତ ପାୱାରଙ୍କୁ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନ୍ସିପି)ର ‘ଘଡ଼ି’ ଚିହ୍ନ ବ୍ୟବହାର କରିବାରୁ ରୋକିବା ପାଇଁ ଦଳର ପ୍ରତିଷ୍ଠାତା ଶରଦ ପାୱାର ସୁପ୍ରିମକୋର୍ଟରେ ଏକ ନୂତନ ପିଟିସନ୍ ଦାଖଲ କରିଛନ୍ତି। ଶରଦ ପାୱାର ତାଙ୍କ ଆବେଦନରେ ଦର୍ଶାଇଛନ୍ତି ଯେ ଅଜିତ ପାୱାର ଭୋଟରଙ୍କ ମଧ୍ୟରେ ଦ୍ୱନ୍ଦ୍ୱ ଏଡ଼ାଇବା ପାଇଁ ନୂତନ ନିର୍ବାଚନ ଚିହ୍ନ ନିମନ୍ତେ ଆବେଦନ କରିବା ଉଚିତ୍ । ନିର୍ବାଚନ ପ୍ରକ୍ରିୟା ସମୟରେ ନିରପେକ୍ଷତା ଓ ସ୍ପଷ୍ଟତା ବଜାୟ ରଖିବା ଉପରେ ଏହି ଆବେଦନରେ ଗୁରୁତ୍ବାରୋପ କରାଯାଇଛି। ନିର୍ବାଚନ କମିସନଙ୍କ ଦ୍ବାରା ଅସ୍ଥାୟୀ ଭାବେ ‘ତୁରା ବଜାଉଥିବା ଲୋକ’ ଚିହ୍ନ ପାଇଥିବା ଶରଦ ପାୱାର ଏନ୍ସିପି ଏବଂ ଘଡ଼ି ଚିହ୍ନ ମଧ୍ୟରେ ତାଙ୍କର ୨୫ ବର୍ଷର ସମ୍ପର୍କ ଉପରେ ଗୁରୁତ୍ୱାରୋପ କରିଛନ୍ତି।