ହାତ ଗଲା , ପାର୍ଟି ଗଲା ଏବେ ଖୁଲୁମଖୁଲା ପ୍ରଚାର କରିବେ ସୁର

ଭୁବନେଶ୍ବର: ହାତ ଗଲା , ପାର୍ଟି ଗଲା , ଏବେ ଖୁଲୁମଖୁଲା ପ୍ରଚାର କରିବେ ସୁର । ପୁଅ ପାଇଁ ପ୍ରଚାର କରିବାକୁ ଏବେ ଆଉ କିଛି ସଂକୋଚ ନାହିଁ । ଦଳରୁ ବହିଷ୍କାର ହେବା ପରେ ଏବେ ସୁରେଶ ରାଉତରାୟ ନିଜ ପୁଅ ମନ୍ମଥ ରାଉତରାୟଙ୍କ ପାଇଁ ପ୍ରଚାର କରିବାରେ ସମସ୍ୟା ନଥିବା କହିଛନ୍ତି । କଂଗ୍ରେସରେ ଥାଇ ପ୍ରଚାର କରିବାରେ ତାଙ୍କୁ ଅସୁବିଧା ହୋଇଥାନ୍ତା । ତେବେ ନିର୍ବାଚନ ପରେ ପୁଣି ସେ କଂଗ୍ରେସ କାର୍ଯ୍ୟାଳୟ ଯାଇ ଦଳ ପାଇଁ କାମ କରିବେ ବୋଲି ସିଧା ସିଧା କହିଛନ୍ତି । ଏବେ ସୁରଙ୍କ ପାଖରୁ ଦଳ ଯାଇଛି, ହାତ ଚିହ୍ନ ଯାଇଛି । ଏବେ ସେ ପୁଅ ପାଇଁ ସିଧା ସିଧା କହିପାରିବେ ମାଡ଼ି ଚାଲି । ତେବେ ତାଙ୍କ ପୁଅ ମନ୍ମଥ ବାପାଙ୍କ ସମର୍ଥନ ସିନା ପାଇଲେ କଂଗ୍ରେସ କାର୍ଯ୍ୟକର୍ତ୍ତାଙ୍କ କେତେ ସମର୍ଥନ ପାଉଛନ୍ତି ତାହା ପରେ ଜଣାପଡିବ । ଏଠାରେ ସୂଚନାଯୋଗ୍ୟ ଯେ ସୁରଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି କଂଗ୍ରେସ । ବିଶୃଙ୍ଖଳା ଓ ଦଳବିରୋଧୀ କାର୍ଯ୍ୟ ପାଇଁ ଦଳ ୬ ବର୍ଷ ପାଇଁ କଂଗ୍ରେସରୁ ବହିଷ୍କାର କରିଛି । ତାଙ୍କ ନାମରେ ପୁଅ ମନ୍ମଥଙ୍କ ପାଇଁ ପ୍ରଚାର କରିବାର ଅଭିଯୋଗ ରହିଥିଲା । ଦଳର ଶୃଙ୍ଖଳାରୁ ବାହାରେ ଥିବାରୁ ବହିଷ୍କାର କରିଛି ଦଳ । ସୁର ଆହୁରି କହିଛନ୍ତି ସେ ମୋତେ ୬ ବର୍ଷ ପାଇଁ କାହିଁକି ବହିଷ୍କାର କଲେ, ସେ ନେଇ ମୁଁ ତାଙ୍କୁ ନୋଟିସ ଜରିଆରେ ପଚାରିବି। ମୁଁ ମଲା ଯାଏ କଂଗ୍ରେସରେ ରହିବି। ମୁଁ କଂଗ୍ରେସ ପାଇଁ କାମ କରିବି। କଂଗ୍ରେସରେ ଏବେ ଦୁଇ ଟଙ୍କିଆ ନେତା ଥିବା ସେ କହିଛନ୍ତି । ୫୦ ବର୍ଷରୁ ଅଧିକ ସମୟ ଧରି ମୁଁ କଂଗ୍ରେସ ପାଇଁ କାମ କରିଛି। ଯଦି ମୋ ପୁଅ ଅଲଗା ଦଳରୁ ଟିକେଟ୍‌ ପାଇଲା ବୋଲି ମୋତେ ବାହାର କରି ଦିଆଗଲା, ତା’ହେଲେ କିଛି ଆପତ୍ତି ନାହିଁ। ଏନେଇ କୌଣସି ପ୍ରକାର ଦୁଃଖ ବି ନାହିଁ।