ଆଜି’ଆନ୍ତର୍ଜାତିକ ପାଲେଷ୍ଟିନୀୟ ସଂହତି ଦିବସ’

ଆଜି ନଭେମ୍ବର ୨୯ ତାରିଖରେ ‘ଆନ୍ତର୍ଜାତିକ ପାଲେଷ୍ଟିନୀୟ ସଂହତି ଦିବସ’ ପାଳିତ ହୋଇ ଆସୁଛି। ଏହି ଦିବସ ପ୍ରତ୍ୟେକ ବ୍ୟକ୍ତି, ରାଷ୍ଟ୍ର ଓ ସଂଗଠନମାନଙ୍କୁ ପାଲେଷ୍ଟିନୀୟଙ୍କ ସହ ଏକତାର ସହ ଛିଡ଼ା ହେବାକୁ ଉତ୍ସାହିତ କରି ଆସୁଛି। ଏଥି ସହିତ ଏହା ଆତ୍ମନିୟନ୍ତ୍ରଣ, ନ୍ୟାୟ ଓ ହିଂସା-ଅତ୍ୟାଚାରମୁକ୍ତ ଜୀବନ ପାଇଁ ପାଲେଷ୍ଟିନୀୟମାନଙ୍କ ଅଧିକାର ଉପରେ ଗୁରୁତ୍ବାରୋପ କରୁଛି। ୧୯୪୭ ମସିହା ନଭେମ୍ବର ୨୯ ତାରିଖରେ ମିଳିତ ଜାତିସଂଘର ସାଧାରଣ ପରିଷଦରେ ଏକ ଐତିହାସିକ ପ୍ରସ୍ତାବ ଗୃହୀତ ହୋଇଥିଲା, ଯେଉଁଥିରେ ପାଲେଷ୍ଟାଇନ୍‌କୁ ପୃଥକ୍‌ ଇହୁଦୀ ଓ ଆରବ ରାଷ୍ଟ୍ରରେ ବିଭକ୍ତ କରି ଜେରୁଜେଲମ୍‌କୁ ଏକ ଅନ୍ତର୍ଜାତୀୟ ସହର ଭାବେ ଘୋଷଣା କରିବାକୁ ସୁପାରିସ କରାଯାଇଥିଲା। ଇସ୍ରାଏଲ-ପାଲେଷ୍ଟାଇନ୍‌ ସଂଘର୍ଷ ଇତିହାସର ଏକ ଗୁରୁତ୍ବପୂର୍ଣ୍ଣ ମୁହୂର୍ତ୍ତ ଥିଲା। ସେହି ଦିବସକୁ ସ୍ମରଣୀୟ କରିବା ଲାଗି ୧୯୭୭ ମସିହାରେ ଏହି ସଂହତି ଦିବସର ସ୍ଥାପନା ହୋଇଥିଲା। ଏହା ପାଲେଷ୍ଟିନୀୟ ଲୋକଙ୍କ ନ୍ୟାୟ, ଶାନ୍ତି ଓ ଅଧିକାର ପାଇଁ ସଂଗ୍ରାମ ଉପରେ ଆଲୋକପାତ କରି ଆସୁଛି। ଏଥି ସହିତ ଏହା ଇସ୍ରାଏଲ ଓ ପାଲେଷ୍ଟାଇନ୍‌ ମଧ୍ୟରେ ଲାଗି ରହିଥିବା ବିବାଦ ଏବଂ ତାହାର ନ୍ୟାୟପୂର୍ଣ୍ଣ ତଥା ଶାନ୍ତିପୂର୍ଣ୍ଣ ସ୍ଥାୟୀ ସମାଧାନର ଗୁରୁତ୍ବକୁ ମନେ ପକାଇ ଦେଉଛି।