ବିଜେଡି କି କଂଗ୍ରେସରୁ ଲଢ଼ିବେ ସମରେନ୍ଦ୍ର! ନିର୍ବାଚନ ଲଢ଼ିବେ ନାହିଁ ନରସିଂହ ମିଶ୍ର

ଭୁବନେଶ୍ବର: ଯାହା ଚର୍ଚା ହେଉଥିଲା ତାହା ସତ୍ୟ ହୋଇଛି । ଆଗାମୀ ନିର୍ବାଚନରେ ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର ନିର୍ବାଚନ ଲଢ଼ିବେ ନାହିଁ ବୋଲି ଘୋଷଣା କରିବା ପରେ ତାଙ୍କ ପୁଅ ସମରେନ୍ଦ୍ର ବିଜେଡି କି କଂଗ୍ରେସରୁ ନିର୍ବାଚନ ଲଢ଼ିବେ ତାକୁ ନେଇ ଚର୍ଚା ଜୋର ଧରିଛି ।  । ୨୦୨୪ ସାଧାରଣ ନିର୍ବାଚନକୁ ଆଉ କେଇଟା ମାସ ଥିବାବେଳେ ନରସିଂହ ମିଶ୍ର  ନିର୍ବାଚନ ଲଢ଼ିବେ ନାହିଁ ବୋଲି ଘୋଷଣା କରିଛନ୍ତି ।   ବଲାଙ୍ଗୀର ବିଧାୟକ ନରସିଂହ ମିଶ୍ର ପୂର୍ବରୁ ଘୋଷଣା କରି ଲୋକଙ୍କ ଆଗରେ ପୁଅକୁ ସମର୍ଥନ କରିବା ପାଇଁ ପରୋକ୍ଷରେ ଏପରି କହିଛନ୍ତି ।  କଂଗ୍ରେସ ଦଳର ବରିଷ୍ଠ ବିଧାୟକ ନରସିଂହ ମିଶ୍ର କହିଛନ୍ତି ତାଙ୍କ ସାନ ପୁଅ ସମରେନ୍ଦ୍ର ମିଶ୍ର ବଲାଙ୍ଗୀରରୁ ପ୍ରାର୍ଥୀ ହେବେ। ସମରେନ୍ଦ୍ର ପ୍ରାର୍ଥୀ ହେବା ଆପତତଃ ସ୍ଥିର ହୋଇଛି । ତେବେ କଂଗ୍ରେସ ଦଳ ପକ୍ଷରୁ କାହାକୁ ଟିକେଟ ଦେବା ଘୋଷଣା ହୋଇନାହିଁ । ନରସିଂହ ମିଶ୍ରଙ୍କ ପୁଅ ବିଜେଡିକୁ ଯିବେ ବୋଲି ଦୁଇ ବର୍ଷ ହେଲା ବଲାଙ୍ଗୀର ରାଜନୀତିରେ ଚର୍ଚା ହେଉଛି । ସେ ମଧ୍ୟ ଅନେକ ଦିନ ଧରି ରାଜନୀତିରେ ସଂପୃକ୍ତ ରହିଛନ୍ତି । ତେଣୁ ନିର୍ବାଚନ ଲଢ଼ିବା ପାଇଁ ପୁଅ କେଉଁ ଦଳରୁ ପ୍ରାର୍ଥୀ ହେବେ ତାକୁ ନେଇ ଏବେ ଚର୍ଚା ଆରମ୍ଭ ହୋଇଯାଇଛି । ଯଦିଓ ନରସିଂହ ମିଶ୍ର କହିଛନ୍ତି ସମରେନ୍ଦ୍ର ଅନ୍ୟଦଳରୁ ଲଢ଼ିବାର ପ୍ରଶ୍ନ ଉଠୁନାହିଁ ତେବେ ଆଗାମୀ ଦିନରେ ସମରେନ୍ଦ୍ର କେଉଁ ଦଳରୁ ଟିକେଟ ପାଉଛନ୍ତି ତାହା ଦେଖିବାକୁ ବାକି ରହିଲା ।