ଆଜି ଜାତୀୟ ହସ୍ତତନ୍ତ ଦିବସ

ଆଜି ଜାତୀୟ ହସ୍ତତନ୍ତ ଦିବସ । ସାରା ଦେଶରେ  କେନ୍ଦ୍ର ସରକାର ୨୦୧୫ ମସିହାଠାରୁ ପ୍ରତିବର୍ଷ ଅଗଷ୍ଟ ୭ ତାରିଖକୁ ଜାତୀୟ ହସ୍ତତନ୍ତ ଦିବସ ରୂପେ ପାଳନ କରି ଆସୁଛନ୍ତି । ଏହାଦ୍ବାରା ସ୍ୱଦେଶୀ ଶିଳ୍ପ ଏବଂ ବିଶେଷ ଭାବରେ ହସ୍ତତନ୍ତ ବୁଣାକାରମାନେ ଉତ୍ସାହିତ ହୋଇ କାମ କରୁଛନ୍ତି । ବଜାର ଚାହିଦା ବଢ଼ିଛି ।  ଏ କ୍ଷେତ୍ରରେ କାମ କରୁଥିବା କାରିଗର ଏବଂ  ଶିଳ୍ପ ଗତ କିଛି ବର୍ଷ ହେଲା ରୋଜଗାର ବଢ଼ାଇବା ସହ ଏକ୍ଷେତ୍ର ଉନ୍ନତି କରୁଛି ।  ୧୯୦୫ ମସିହା ଅଗଷ୍ଟ ୭ ତାରିଖରେ ଆରମ୍ଭ ହୋଇଥିବା ସ୍ୱଦେଶୀ ଆନ୍ଦୋଳନକୁ ସ୍ମରଣ ରଖିବା ପାଇଁ ଏହି ଦିବସକୁ ଜାତୀୟ ହସ୍ତତନ୍ତ ଦିବସ ରୂପେ ପାଳନ କରାଯାଉଛି । ଏହି ଅବସରରେ  କାର୍ଯ୍ୟକ୍ରମମାନ ଅନୁଷ୍ଠିତ ହେଉଛି । ଚଳିତ ବର୍ଷ ୯ମ ଜାତୀୟ ହସ୍ତତନ୍ତ ଦିବସ ପାଳନ କରାଯାଉଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦିଲ୍ଲୀର ପ୍ରଗତି ମୈଦାନରେ ଭାରତ ମଣ୍ଡପମ ଠାରେ ଜାତୀୟ ହସ୍ତତନ୍ତ ଦିବସ ଉତ୍ସବରେ ଅଂଶଗ୍ରହଣ କରିବେ। ପ୍ରଧାନମନ୍ତ୍ରୀ ସର୍ବଦା କାରିଗର ଏବଂ କଳାକାରମାନଙ୍କୁ ଉତ୍ସାହିତ ଏବଂ ନୀତିଗତ ସମର୍ଥନ ପ୍ରଦାନ କରିବାରେ ଏକ ଦୃଢ଼ ପ୍ରୋତ୍ସାହକ ରହିଆସିଛନ୍ତି, ଯେଉଁମାନେ ଦେଶର ସମୃଦ୍ଧ ପରମ୍ପରା ତଥା କଳା ଏବଂ କାରିଗରୀରେ ବଞ୍ଚାଇ ରଖିଛନ୍ତି। ଏହି ଲକ୍ଷ୍ୟର ମାର୍ଗଦର୍ଶନ କରି ସରକାର ଜାତୀୟ ହସ୍ତତନ୍ତ ଦିବସ ପାଳନ କରିବା ଆରମ୍ଭ କରିଥିଲେ, ଯାହା ପ୍ରଥମେ ଅଗଷ୍ଟ ୭, ୨୦୧୫ ରେ ଅନୁଷ୍ଠିତ ହୋଇଥିଲା। ବୁଣାକାରମାନଙ୍କୁ ଆର୍ଥିକ ସହାୟତା ସହ ଅନ୍ୟାନ୍ୟ ସୁବିଧା ସୁଯୋଗ ଯୋଗାଇ ଦିଆଯିବା ଦ୍ୱାରା ହସ୍ତତନ୍ତ କ୍ଷେତ୍ର ସମୃଦ୍ଧ ହେବାରେ ଲାଗିଛି। ଗ୍ରାମ୍ୟ ଅର୍ଥନୀତି ସମୃଦ୍ଧ ହେଉଛି, ବୁଣାକାରମାନଙ୍କର ଆର୍ଥିକ ଅବସ୍ଥାରେ ଉନ୍ନତି ଆସିଛି।

ଚଳିତ ବର୍ଷ ୯ମ ଜାତୀୟ ହସ୍ତତନ୍ତ ଦିବସ ପାଳନ କରାଯାଉଛି। ଏହି କାର‌୍ୟ୍ୟକ୍ରମରେ ପ୍ରଧାନମନ୍ତ୍ରୀ “ଭାରତୀୟ ବସ୍ତ୍ର ଏବଂ ଶିଳ୍ପକୋଷ” ର ଇ-ପୋର୍ଟାଲ ମଧ୍ୟ ଉନ୍ମୋଚନ କରିବେ ଯାହାକି ଟେକ୍ସଟାଇଲ୍ ଓ କାରିଗରିର ଏକ ଭଣ୍ଡାର। ଏହାକୁ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଫ୍ୟାଶନ୍ ଟେକ୍ନୋଲୋଜି (ଏନଆଇଏଫଟି) ଦ୍ୱାରା ବିକଶିତ କରାଯାଇଛି। ଏହି କାର‌୍ୟ୍ୟକ୍ରମରେ ୩୦୦୦ ରୁ ଅଧିକ ହ୍ୟାଣ୍ଡଲୁମ୍ ଏବଂ ଖଦି ବୁଣାକାର, କାରିଗର ଏବଂ ବୟନଶିଳ୍ପ ଏବଂ ଏମ୍ଏସ୍ଏମ୍ଇ କ୍ଷେତ୍ରର ହିତାଧିକାରୀମାନେ ଯୋଗଦେଇଛନ୍ତି। ଏହା ସମଗ୍ର ଭାରତରେ ହ୍ୟାଣ୍ଡଲୁମ୍ କ୍ଲଷ୍ଟର, ଏନଆଇଏଫଟି କ୍ୟାମ୍ପସ୍, ବୁଣାକାର ସେବା କେନ୍ଦ୍ର, ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ହ୍ୟାଣ୍ଡଲୁମ୍ ଟେକ୍ନୋଲୋଜି କ୍ୟାମ୍ପସ୍, ନ୍ୟାସନାଲ ହ୍ୟାଣ୍ଡଲୁମ୍ ଡେଭଲପମେଣ୍ଟ କର୍ପୋରେସନ୍, ହ୍ୟାଣ୍ଡଲୁମ୍ ଏକ୍ସପୋର୍ଟ ପ୍ରମୋସନ କାଉନ୍‌ସିଲ୍, କେଭିଆଇସି ଅନୁଷ୍ଠାନ ଏବଂ ବିଭିନ୍ନ ରାଜ୍ୟ ହସ୍ତତନ୍ତ ବିଭାଗକୁ ଏକତ୍ର କରିବ।

ରାଜ୍ୟର  ପାଟ ଶାଢ଼ୀ ଓ ଯୋଡ଼,  କୋଟପାଡ଼ ଶାଢ଼ୀ ସମେତ ସମ୍ବଲପୁରୀ ପାଟ ବସ୍ତ୍ର ଆଦି  ଏହି ହସ୍ତତନ୍ତଗୁଡ଼ିକ ନିଜର ସ୍ୱତନ୍ତ୍ରତା, ମୌଳିକତା ତଥା ଗୁଣବତ୍ତା ବଜାୟ ରଖିବା କାରଣରୁ ରାଜ୍ୟର ହସ୍ତତନ୍ତର ଚାହିଦା କ୍ରମଶଃ ବଢ଼଼ିବାରେ ଲାଗିଛି।  ୨୦୨୨-୨୩ ଆର୍ଥିକ ବର୍ଷରେ ରାଜ୍ୟର ହସ୍ତତନ୍ତ ଶିଳ୍ପର ଉତ୍ପାଦ ୪୧୦ କୋଟି ୩୭ ଲକ୍ଷରେ ପହଞ୍ଚିଛି। ବୟନିକାର ବାର୍ଷିକ ବ୍ୟବସାୟ ୧୬୨ କୋଟି ୧୪ ଲକ୍ଷ, ସମ୍ବଲପୁରୀ ବସ୍ତ୍ରାଳୟ ୭୧ କୋଟି ୨୪ ଲକ୍ଷ, ଉତ୍କଳିକା ୧୭ କୋଟି ୭୯ ଲକ୍ଷ ଓ ଅମ୍ଲାନ୍‌‌ ଷ୍ଟୋରର ବାର୍ଷିକ ବ୍ୟବସାୟ ୪ କୋଟି ୪୬ ଲକ୍ଷରେ ପହଞ୍ଚିପାରିଛି।