ଜାଭ୍‌ଲିନ୍‌ରେ ସ୍ବର୍ଣ୍ଣ ପଦକ ଜିତିଥିବା ଓଡ଼ିଆ ପୁଅ କିଶୋର ଜେନାଙ୍କୁ ଶ୍ରେ‌ଷ୍ଠ ପୁରୁଷ ଫିଙ୍ଗାଳି ପୁରସ୍କାର

ଭୁବନେଶ୍ବର: ଶ୍ରୀଲଙ୍କା ଜାତୀୟ ଦୌଡ଼କୁଦ ପ୍ରତିଯୋଗିତା (କଲମ୍ବୋ ମିଟ୍‌) ରିଲେରେ ଭାରତୀୟ ଖେଳାଳି ଦବ୍‌ଦବା ଦେଖାଇ ୩ ସ୍ବର୍ଣ୍ଣ ଓ ୧ ରୌପ୍ୟ ସହ ୪ ପଦକ କରାୟତ୍ତ କରିଛନ୍ତି। ଅନ୍ୟପକ୍ଷରେ ଦୁଇ ଦିନ ତଳେ ଏଠାରେ ଜାଭ୍‌ଲିନ୍‌ରେ ସ୍ବର୍ଣ୍ଣ ପଦକ ଜିତିଥିବା ଓଡ଼ିଆ ପୁଅ କିଶୋର ଜେନାଙ୍କୁ ଶ୍ରେ‌ଷ୍ଠ ପୁରୁଷ ଫିଙ୍ଗାଳି ପୁରସ୍କାର ମିଳିଛି।ରବିବାର ମିଶ୍ରିତ ୪ଗୁଣା ୪୦୦ ମିଟର ରିଲେରେ ଭାରତର ଦୁଇଟି ଦଳ ଭାଗ ନେଇଥିଲା ବେଳେ ସ୍ବର୍ଣ୍ଣ ଓ ରୌପ୍ୟ ମିଳିଥିଲା। ଆମୋଜ ଜାକବ, ଐଶ୍ବର୍ଯ୍ୟା ମିଶ୍ରା, ମହମ୍ମଦ ଆନସ ଓ ହିମାଂଶୀ ମଲ୍ଲିକଙ୍କୁ ନେଇ ଗଠିତ ଦଳ (୩:୧୭.୩୩ ସେକେଣ୍ଡ) ଏବଂ ନିହାଲ ଜୋଏଲ, ଶୁଭା ଭି, ମିଚୋ ଚାକୋ ଓ ଭିଥ୍ୟାଙ୍କୁ ନେଇ ଗଠିତ ଦଳ (୩:୧୮.୦୩ ସେକେଣ୍ଡ) ଯଥାକ୍ରମେ ୧-୨ରେ ରେସ୍‌ ଫିନିସ୍‌ କରିଥିଲେ। ୪ଗୁଣା ୪୦୦ ମିଟର ରିଲେ ପରୁଷ ଦଳ (୩:୦୨.୦୩ ସେକେଣ୍ଡ) ଏବଂ ମହିଳା ଦଳ (୩:୩୦.୪୧ ମିନିଟ୍‌) ସ୍ବର୍ଣ୍ଣ ଜିତିଥିଲେ।