ସୋସିଆଲ ମିଡିଆରେ ବ୍ୟକ୍ତିଗତ କିମ୍ବା ବ୍ୟାଙ୍କିଙ୍ଗ ସମ୍ପର୍କିତ ତଥ୍ୟ ସେୟାର ନ କରିବାକୁ ପରାମର୍ଶ
ମୋବାଇଲ କଲ୍, ମେସେଜ ଏବଂ ସୋସିଆଲ ମିଡିଆରେ ବ୍ୟକ୍ତିଗତ କିମ୍ବା ବ୍ୟାଙ୍କିଙ୍ଗ ସମ୍ପର୍କିତ ତଥ୍ୟ ସେୟାର କରନ୍ତୁ ନାହିଁ । ଏପରି ନ କରିବାକୁ ପରାମର୍ଶ ଦେଇଛି ଟ୍ରାଇ । ସେହିଭଳି ସନ୍ଦେହଜନକ କଲ୍ ପାଇଲେ ଏହାକୁ ଉଠାନ୍ତୁ ନାହିଁ । ଏହାକୁ କାଟିଦେବା ଲାଗି ମଧ୍ୟ ପରାମର୍ଶରେ କୁହାଯାଇଛି । ସାଇବର ଅପରାଧ ଯଦି ହୋଇଛି ତେବେ ଜାତୀୟ ହେଲ୍ପଲାଇନ ୧୯୩୦ରେ ରିପୋର୍ଟ କରାଯାଇପାରିବ । ଲୋକଙ୍କ ଅଭିଯୋଗ ଆଧାରରେ ଏଭଳି କାର୍ଯ୍ୟାନୁଷ୍ଠାନ ହୋଇଛି । ଟେଲିକମ ସେବାର ଅପବ୍ୟବହାର ରୋକିବା ଦିଗରେ ଲୋକମାନେ ଅଧିକ ସଂଖ୍ୟାରେ ଟ୍ରାଇ ଡିଏନ୍ଡି ଆପ୍ରେ ରିପୋର୍ଟ କରିବାକୁ ପରାମର୍ଶ ଦେଇଛି ନିୟାମକ ।
ଭାରତୀୟ ଟେଲିକମ ନିୟାମକ କର୍ତ୍ତୃପକ୍ଷ (ଟ୍ରାଇ) ସ୍ପାମ୍ ଏବଂ ଠକେଇ ପାଇଁ ଉଦ୍ଦିଷ୍ଟ ଟେଲିକମ କଲ୍ ଗୁଡ଼ିକ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରୁଛି । ଏ ଦିଗରେ ଗତ ବର୍ଷକରେ ୨୧ ଲକ୍ଷ ଜାଲ୍ ନମ୍ବର ବ୍ଲକ କରାଯାଇଛି । ୧ ଲକ୍ଷ ସଂସ୍ଥାକୁ କଳାତାଲିକାଭୁକ୍ତ କରାଯାଇଥିବା ଟେଲିକମ୍ ମନ୍ତ୍ରଣାଳୟ ପକ୍ଷରୁ ସୋମବାର ସୂଚନା ମିଳିଛି ।
ଟ୍ରାଇ କହିଛି, ଅନେକ ୟୁଜର ଭାବୁଛନ୍ତି ଟେଲିଫୋନରେ କୌଣସି ନମ୍ବରକୁ ବ୍ଲକ କରିଦେବା ହିଁ ସର୍ବଶ୍ରେଷ୍ଠ କାମ । ଏଭଳି ବ୍ଲକ ଦ୍ୱାରା ନିର୍ଦ୍ଧିଷ୍ଟ ଡିଭାଇସରେ ନମ୍ବର ଦେଖାଯାଇ ନ ଥାଏ । ମାତ୍ର ସାଇବର ଅପରାଧୀମାନେ ଅନ୍ୟ ଲୋକଙ୍କୁ ସହଜରେ ଟାର୍ଗେଟ କରିପାରିବେ । ସ୍ପାମ୍ କଲ୍ ଏବଂ ଏସ୍ଏମ୍ଏସ ରିପୋର୍ଟ କରାଗଲେ ଟେଲିକମ ସେବା ଯୋଗାଣକାରୀ ଫ୍ରଡରେ ଲିପ୍ତ ଥିବା କୌଣସି ନମ୍ବରକୁ ସ୍ଥାୟୀ ଭାବେ ବାତିଲ କରିବା ସହଜ ହୋଇଥାଏ ।