ଝାରସୁଗୁଡା ଏସପି ଗୁଣ୍ଡଲା ରେଡ୍ଡୀ ରାଘବେନ୍ଦ୍ରଙ୍କୁ କେନ୍ଦ୍ରୀୟ ଗୃହମନ୍ତ୍ରୀ ପଦକ

ଝାରସୁଗୁଡା : କେନ୍ଦ୍ର ସରକାର ପକ୍ଷରୁ ପ୍ରତିବର୍ଷ 31 ଅକ୍ଟୋବରରେ ସର୍ଦାର ବଲ୍ଲଭଭାଇ ପଟେଲଙ୍କ ଜନ୍ମଦିନ ଉପଲକ୍ଷେ “ରାଷ୍ଟ୍ରୀୟ ଏକତା ଦିବସ” ଭାବେ ପାଳନ କରାଯାଏ। ଏହି ଅବସରରେ ପୋଲିସ ବିଭାଗରେ ବିଶେଷ କୁଶଳତା, ସାହସ ଓ ସେବାଭାବ ପ୍ରଦର୍ଶନ କରିଥିବା ଅଧିକାରୀମାନଙ୍କୁ “କେନ୍ଦ୍ରୀୟ ଗୃହମନ୍ତ୍ରୀ ପଦକ” ପ୍ରଦାନ କରାଯାଏ। ଏହି ପଦକ ପ୍ରତିବର୍ଷ ସ୍ପେସିଆଲ ଅପରେସନ୍, ଇନଭେସ୍ଟିଗେସନ୍, ଇଣ୍ଟେଲିଜେନ୍ସ ଓ ଅପରାଧ ନିୟନ୍ତ୍ରଣ ରେ ସ୍ୱତନ୍ତ୍ର କାର୍ଯ୍ୟକୁଶଳତା ଦେଖାଇଥିବା ପୋଲିସ କର୍ମୀମାନଙ୍କୁ ଦିଆଯାଏ।

ଏବର୍ଷ ସମଗ୍ର ଦେଶର 1466 ଜଣ ପୋଲିସ କର୍ମଚାରୀ ଏହି ଗୌରବମୟ ପଦକ ହାସଲ କରିଛନ୍ତି। ଓଡ଼ିଶା ପାଇଁ ଗର୍ବର ବିଷୟ ହେଉଛି ଯେ, ଝାରସୁଗୁଡା ଜିଲ୍ଲା ପୋଲିସ ସୁପରିଣ୍ଡେଣ୍ଡେଣ୍ଟ (SP) ଗୁଣ୍ଡଲା ରେଡ୍ଡୀ ରାଘବେନ୍ଦ୍ର ଏହି ପଦକ ଅର୍ଜନ କରି ଜିଲ୍ଲା ଓ ରାଜ୍ୟର ନାମ ଉଜ୍ଜ୍ୱଳ କରିଛନ୍ତି।

ଏସପି ଗୁଣ୍ଡଲା ରେଡ୍ଡୀ ତାଙ୍କ କାର୍ଯ୍ୟକାଳରେ ଝାରସୁଗୁଡା ଜିଲ୍ଲାରେ ଅପରାଧ ନିୟନ୍ତ୍ରଣ, ମାଫିଆ ଓ ଅବୈଧ ବ୍ୟବସାୟ ଉପରେ ଅଭିଯାନ, ଡ୍ରଗ୍ ଟ୍ରାଫିକିଂ ବିରୋଧରେ କାର୍ଯ୍ୟବାହୀ ଏବଂ ଶାନ୍ତି ସୁରକ୍ଷା ବ୍ୟବସ୍ଥା ରକ୍ଷା ରେ ଅସାଧାରଣ ପାରଦର୍ଶିତା ଦେଖାଇଥିଲେ। ସେ ନିଜ ନେତୃତ୍ୱରେ ଜିଲ୍ଲା ପୋଲିସ ଦଳକୁ ଆଧୁନିକ ତଥ୍ୟପ୍ରଯୁକ୍ତି ଓ ସମୟୋପଯୋଗୀ ପଦକ୍ଷେପ ମାଧ୍ୟମରେ ଆଗକୁ ନେଇ ଯାଇଛନ୍ତି।

ଝାରସୁଗୁଡା ଜିଲ୍ଲାବାସୀ, ପୋଲିସ ବିଭାଗର ସହଯୋଗୀ ଅଧିକାରୀ ଓ ସମାଜସେବୀମାନେ ଏହି ସଫଳତା ପାଇଁ ଗୁଣ୍ଡଲ ରେଡ୍ଡୀଙ୍କୁ ଅଭିନନ୍ଦନ ଜଣାଇଛନ୍ତି। ସେମାନେ କହିଛନ୍ତି ଯେ, ଏହି ପଦକ ଝାରସୁଗୁଡା ପୋଲିସ ଙ୍କ କାର୍ଯ୍ୟସଫଳତାର ପ୍ରମାଣ ଓ ସମସ୍ତଙ୍କ ପାଇଁ ପ୍ରେରଣା।

ସେପଟେ, ଏହି ପଦକ ଦେଶର ସୁରକ୍ଷା ବ୍ୟବସ୍ଥା ଓ ପୋଲିସ ମଧ୍ୟରେ ଶୃଙ୍ଖଳା, ସମର୍ପଣ ଓ ସେବା ମନୋଭାବର ଉଦାହରଣ ସୃଷ୍ଟି କରେ। ଝାରସୁଗୁଡା ଜିଲ୍ଲାରେ ଏହି ସମ୍ମାନ ଆସିଥିବାରେ ଲୋକମାନେ ଗର୍ବିତ ଅନୁଭବ କରୁଛନ୍ତି।