କଂଗ୍ରେସ ପିସିସି ସଭାପତି ଭକ୍ତ ଦାସ ନୂଆପଡ଼ାରେ କଂଗ୍ରେସର ଶୋଚନୀୟ ପରାଜୟକୁ ନେଇ କହିଛନ୍ତି, ସବୁ ଦଳରେ ବିଭୀଷଣ ଅଛନ୍ତି। ଆଉ ଆମ ଦଳ କଂଗ୍ରେସରେ ବି ବିଭୀଷଣ ଅଛନ୍ତି। ଯେଉଁମାନଙ୍କ ପାଇଁ ଦଳକୁ ଆଶାନୁରୂପ ସଫଳତା ମିଳିଲାନି। ଏହି କାରଣରୁ ବିଭୀଷଣମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ। ଭକ୍ତ ଦାସ ଆହୁରି କହିଛନ୍ତି, କଂଗ୍ରେସ ଦ୍ବିତୀୟ ସ୍ଥାନରେ ଅଛି, ତଥାପି ଆତ୍ମ ସମୀକ୍ଷା କରିବୁ। ସେ କହିଛନ୍ତି ଯେ ନୂଆପଡ଼ା ଉପନିର୍ବାଚନରେ ଶାସକ ଦଳ ଅର୍ଥ, ବାହୁବଳ ଓ ସରକାରୀ କଳର ଅପବ୍ୟବହାର କରିଥିଲା। ବିଜେପିର ଏହି କଳ, ବଳ ଓ କୌଶଳ ବିରୋଧରେ ଲଢେଇ କରି କଂଗ୍ରେସ ପ୍ରାର୍ଥୀ ୪୦ ହଜାର ଭୋଟ ହାସଲ କରିବା କିଛି ସାଧାରଣ କଥା ନୁହେଁ। ସମସ୍ତ ପ୍ରତିକୂଳ ପରିସ୍ଥିତି ମଧ୍ୟରେ କଂଗ୍ରେସ ନୂଆପଡ଼ାବାସୀଙ୍କ ହୃଦୟ ଜିତିବା ସହ ପ୍ରମୁଖ ବିରୋଧୀ ଦଳର ଭୂମିକା ହାସଲ କରିଥିବା କହିଥିଲେ ପିସିସି ସଭାପତି ଭକ୍ତଚରଣ ଦାସ।
ସେପଟେ ନୂଆପଡ଼ା ଉପନିର୍ବାଚନ ଭୋଟ୍ ରିଗିଂ ଅଭିଯୋଗ ଆଣିଲେ ସ୍ନେହାଙ୍ଗିନୀ ଛୁରିଆ । ସେ କହିଛନ୍ତି ଯେ, ନୂଆପଡ଼ାବାସୀଙ୍କ ସହ ମୁଁ ଅଛି । ସଠିକ୍ ଭାବେ ନିର୍ବାଚନ ହୋଇନି । ଆମ ସହ ଲୋକ ଅଛନ୍ତି । ମୋତେ ପ୍ରାର୍ଥୀ କରିଥିବାରୁ ନବୀନ ପଟ୍ଟନାୟକଙ୍କୁ ଧନ୍ୟବାଦ । ମୋ ପଛରେ ଛିଡ଼ା ହୋଇ ସହଯୋଗ କଲେ, ପ୍ରଚାର କଲେ । ନୂଆପଡ଼ାବାସୀ ବିଜେଡିକୁ ଭଲପାଇବା ଦେଇଛନ୍ତି । ମୋତେ ଭଲ ପାଇବା ଦେଲେ । ଶଙ୍ଖ ଚିହ୍ନକୁ ସମର୍ଥନ ଜଣାଇଛନ୍ତି । ମୁଁ ହାରିଲା ପରେ ବି ମୋତେ ବହୁ ଲୋକ ଫୋନ୍ କରି ଧନ୍ୟବାଦ ଦେଇଛନ୍ତି । ମେସିନ ଭୋଟ୍କୁ ଅଗ୍ରାହ୍ୟ କରୁଛି ।
ନୀତି ନିୟମ ଭିତରେ ଭୋଟ୍ ହୋଇନି । ଜିଲ୍ଲା ପ୍ରଶାସନ ଓ ନିର୍ବାଚନ କମିଶନଙ୍କୁ ନିନ୍ଦା କରୁଛୁ । ବୁଥ୍ ରିଗିଂକୁ ବିରୋଧ କରିଛି । ପଦ୍ମ ଫୁଲରେ ଭୋଟ୍ ଦେବାକୁ ଭୋଟରଙ୍କୁ ଚାପ ପକେଇଥିଲା ବିଜେପି । ଭୋଟିଂ ପ୍ରତିଶତ ଘୋଷଣା ଉପରେ ସନ୍ଦେହ ଲାଗୁଛି । ଅନେକ କଥାକୁ ଅସମ୍ଭବକୁ ସମ୍ଭବ କରିଛି ବିଜେପି । ଜିଲ୍ଲାପାଳଙ୍କଠୁ ଆରମ୍ଭ କରି ଏସ୍ପି ଯାଏଁ ବିଜେପି ପାଇଁ କାମ କରୁଥିଲେ । କିଛି ବୁଥ୍ରେ ୯୦ ପ୍ରତିଶତରୁ ଅଧିକ ଭୋଟିଂ ସନ୍ଦେହ ଜାତ ହେଉଛି । ୪୧ ବୁଥ୍ରେ ୯୦ରୁ ଅଧିକ ପ୍ରତିଶତ ଭୋଟିଂ ପାର ହୋଇଛି । ୫ଟାରେ ଭୋଟ୍ ସରିଛି । ନିର୍ବାଚନକୁ ଖେଳଘର ଭାବିଛନ୍ତି ନିର୍ବାଚନ କମିଶନ ? ନୂଆପଡ଼ା ଏନ୍ଏସି ବ୍ୟତୀତ ଅନ୍ୟ ସବୁ ବୁଥ୍ରେ ରିଗିଂ ଓ ଅନିୟମିତତା ହୋଇଥିବା ଅଭିଯୋଗ ଆଣିଲେ ସ୍ନେହାଙ୍ଗିନୀ ।