ଭୁବନେଶ୍ୱର, ନଭେମ୍ବର ୨୧: ବିହାର ବିଧାନସଭା ନିର୍ବାଚନରେ ଏନଡିଏର ଚମତ୍କାର ବିଜୟର ମୁଖ୍ୟ ରଣନୀତିଜ୍ଞ ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଜି ଦୁଇ ଦିନିଆ ଓଡ଼ିଶା ଗସ୍ତରେ ଆସି ଭୁବନେଶ୍ୱର ବିମାନବନ୍ଦରରେ ପହଞ୍ଚିଛନ୍ତି। ବିହାରରେ ଏନଡିଏକୁ ସ୍ପଷ୍ଟ ଏବଂ ପ୍ରବଳ ବହୁମତ ମିଳିବା ପରେ ସେ ପ୍ରଥମ ଥର ପାଇଁ ଓଡ଼ିଶା ଆସୁଥିବାରୁ, ଭୁବନେଶ୍ୱରରେ ତାଙ୍କୁ ଭବ୍ୟ ସ୍ୱାଗତ କରାଯାଇଛି।
ଶହ ଶହ ବିଜେପି କର୍ମୀ ଓ ନେତା ବିମାନବନ୍ଦରରେ ଉପସ୍ଥିତ ରହି ପାରମ୍ପରିକ ନୃତ୍ୟବାଦ୍ୟ ସହ ଶ୍ରୀ ପ୍ରଧାନଙ୍କୁ ସ୍ୱାଗତ କରିଥିଲେ। ଏହି ଅବସରରେ ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ସାଂସଦ ବିଭୁ ପ୍ରସାଦ ତରାଇ, ବିଧାୟକ ଟଙ୍କଧର ତ୍ରିପାଠୀ, ଗୋଲେକ ମହାପାତ୍ର, ପିଙ୍କି ପ୍ରଧାନ, ତେଜେଶ୍ୱର ପରିଡ଼ା, ଏବଂ ପୂର୍ବତନ ରାଜ୍ୟ ସଭାପତି ସମୀର ମହାନ୍ତି ପ୍ରମୁଖ ଉପସ୍ଥିତ ଥିଲେ।
ସୂଚନାଯୋଗ୍ୟ ଯେ, ସେପ୍ଟେମ୍ବର ମାସରେ ଧର୍ମେନ୍ଦ୍ର ପ୍ରଧାନଙ୍କୁ ବିହାର ନିର୍ବାଚନ ଦାୟିତ୍ୱରେ ରଖାଯାଇଥିଲା। ବିହାରରେ ଏନଡିଏକୁ ୨୦୨ ଆସନ ସହ ସ୍ପଷ୍ଟ ବହୁମତ ମିଳିଥିବାବେଳେ ମହାମେଣ୍ଟ ମାତ୍ର ୩୫ ଆସନରେ ସୀମିତ ରହିଥିଲା।
ନୀତୀଶ କୁମାରଙ୍କ ଯୋଜନା ବ୍ୟତୀତ, ଏହି ସଫଳତା ପଛରେ ବିଜେପିର ସୁପରିକଳ୍ପିତ ରଣନୀତି ଏବଂ ମୋଦୀ-ନୀତୀଶ ଯୋଡ଼ିର ପୁରୁଣା ‘ଚମକ’ ଫେରାଇ ଆଣିବାରେ ଶ୍ରୀ ପ୍ରଧାନଙ୍କ ନିର୍ବାଚନ ରଣନୀତି ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ଜଣେ ପ୍ରମୁଖ ନିର୍ବାଚନ ରଣନୀତିଜ୍ଞ ଭାବରେ ସେ ବିହାରରେ ଦଳକୁ ଏକ ନୂତନ ଶିଖରକୁ ନେଇଛନ୍ତି।
ଭୁବନେଶ୍ୱର ବିମାନବନ୍ଦରରେ ଭବ୍ୟ ସ୍ୱାଗତ ଗ୍ରହଣ କରିବା ପରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସିଧାସଳଖ ପୁରୀ ଅଭିମୁଖେ ଯାତ୍ରା କରିଥିଲେ। ବିହାର ବିଧାନସଭା ନିର୍ବାଚନରେ ଏନ୍ଡିଏ ପାଇଁ ସେ ପ୍ରମୁଖ ରଣନୀତିଜ୍ଞ ଭାବରେ ସଫଳତା ଆଣିବା ପରେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ଦର୍ଶନ କରିବା ତାଙ୍କ ଗସ୍ତର ମୁଖ୍ୟ ଆକର୍ଷଣ ଥିଲା।
ଶ୍ରୀ ପ୍ରଧାନ ଶ୍ରୀମନ୍ଦିରରେ ପହଞ୍ଚିବା ପରେ ଦୀର୍ଘ ସମୟ ଧରି ମହାପ୍ରଭୁ ଜଗନ୍ନାଥ, ବଳଭଦ୍ର ଓ ଦେବୀ ସୁଭଦ୍ରାଙ୍କୁ ଦର୍ଶନ କରିଥିଲେ। ମହାପ୍ରଭୁଙ୍କ ଦର୍ଶନ ଶ୍ରୀ ପ୍ରଧାନ କହିଥିଲେ: “ମହାପ୍ରଭୁ ଶ୍ରୀ ଜଗନ୍ନାଥଙ୍କ ଆଶୀର୍ବାଦ ଓ ଓଡ଼ିଶାବାସୀଙ୍କ ଶୁଭେଚ୍ଛା କାରଣରୁ ବିହାରରେ ଏନ୍ଡିଏ ଏତେ ବଡ଼ ସଫଳତା ହାସଲ କରିପାରିଛି। ଆଜି ମୁଁ ମହାପ୍ରଭୁଙ୍କୁ କୋଟି କୋଟି ପ୍ରଣାମ ଜଣାଇବା ସହ ଓଡ଼ିଶାର ବିକାଶ ଓ ଦେଶର ଉନ୍ନତି ପାଇଁ ତାଙ୍କର କୃପା କାମନା କରୁଛି।”
ତାଙ୍କୁ ସ୍ୱାଗତ କରିବା ପାଇଁ ଶ୍ରୀମନ୍ଦିର ନିକଟରେ ମଧ୍ୟ ବହୁ ସଂଖ୍ୟକ ବିଜେପି କର୍ମୀ ଉପସ୍ଥିତ ଥିଲେ। ପୁରୀରେ ଦର୍ଶନ ସାରିବା ପରେ ସେ ପରବର୍ତ୍ତୀ କାର୍ଯ୍ୟକ୍ରମ ପାଇଁ କଟକ ଅଭିମୁଖେ ଯାତ୍ରା କରିଥିଲେ।