ବାରବାଟୀରେ ଫ୍ଲଡ ଲାଇଟରେ ସୁଧାର ଆସିବ, ରହିବ ବ୍ୟାକଅପ୍ ବ୍ୟବସ୍ଥା

ଡିସେମ୍ବର ୯ରେ ବାରବାଟୀରେ ହେବ ଭାରତ-ଦକ୍ଷିଣ ଆଫ୍ରିକା ଟି-ଟ୍ବେଣ୍ଟି ମୁକାବିଲା । ୫ ତାରିଖରୁ ସାଧାରଣ ଦର୍ଶକଙ୍କ ପାଇଁ ଆରମ୍ଭ ହେବ ଟିକେଟ ବିକ୍ରି । ତେଣୁ ମ୍ୟାଚକୁ ଆଉ ଗୋଟିଏ ସପ୍ତାହ ଥିବାରୁ ଫ୍ଲଡ ଲାଇଟଗୁଡ଼ିକ ଯାଞ୍ଚ କରିଛି ଓସିଏ । ଫ୍ଲଡ ଲାଇଟରେ ଏକ ଡିଜିଟାଲ ସିଙ୍କ୍ରୋନାଇଜ ଲାଇଟ ଡିସପ୍ଲେର ବ୍ୟବସ୍ଥା କରିବାକୁ ଯାଉଛି ଓସିଏ । ଓସିଏର ଏପରି ଉଦ୍ୟମକୁ ପ୍ରଶଂସା କରିଛନ୍ତି ପୂର୍ବତନ କ୍ରିକେଟର ପବନ ଅଗ୍ରୱାଲ ।

କଟକର ବାରବାଟୀ ଷ୍ଟାଡିୟମରେ ଭାରତ-ଦକ୍ଷିଣ ଆଫ୍ରିକା ମଧ୍ୟରେ ଅନୁଷ୍ଠିତ ହେବାକୁ ଥିବା ଟି-ଟ୍ୱେଣ୍ଟି ମୁକାବିଲା ପାଇଁ ଓଡ଼ିଶା କ୍ରିକେଟ୍ ଆସୋସିଏସନ୍ (OCA) ପୂର୍ବରୁ ଥିବା ସମସ୍ତ ତ୍ରୁଟି ସୁଧାରିବାକୁ ଅଧିକ ଗୁରୁତ୍ୱ ଦେଇଛି। ବିଶେଷ କରି ପୂର୍ବ ଘଟଣାକୁ ଦୃଷ୍ଟିରେ ରଖି ଫ୍ଲଡ ଲାଇଟ୍ ବ୍ୟବସ୍ଥାକୁ ସର୍ବାଧିକ ପ୍ରାଧାନ୍ୟ ଦିଆଯାଇଛି। ଗତ ଫେବୃଆରୀ ୯ ତାରିଖରେ ଭାରତ-ଇଂଲଣ୍ଡ ଦିବାରାତ୍ର ମ୍ୟାଚ୍ ସମୟରେ ଫ୍ଲଡ ଲାଇଟରେ ହୋଇଥିବା ତ୍ରୁଟି ଯୋଗୁଁ ୨୨ ମିନିଟ୍ ପାଇଁ ଖେଳ ବନ୍ଦ ରହିବା ଘଟଣାକୁ ନେଇ ଓସିଏ ସାରା ବିଶ୍ୱରେ ନିନ୍ଦିତ ହୋଇଥିଲା। ଏଥର କିନ୍ତୁ ସେହି ତ୍ରୁଟି ଯେପରି ନ ହୁଏ, ସେଥିପାଇଁ କଡ଼ା ପଦକ୍ଷେପ ନିଆଯାଇଛି।

ବ୍ୟାକଅପ୍ ଜେନେରେଟର: ଆଗାମୀ ମ୍ୟାଚ୍ ପାଇଁ ୮ଟି ନୂଆ ହାଇପାୱାର ଜେନେରେଟର ନିୟୋଜିତ ରହିବେ। ପ୍ରତି ଟାୱାର ନିକଟରେ ବ୍ୟାକଅପ୍ ଦେବା ପାଇଁ ଆଉ ଏକ ଡିଜେ ରଖାଯିବ। ମୋଟ ୧୦ଟି ଡିଜେ ଷ୍ଟାଣ୍ଡ ବାଏରେ ରହିବେ।  ଓସିଏର ମୁଖ୍ୟ ବୈଷୟିକ ପରାମର୍ଶଦାତା ବିଷ୍ଣୁପଦ ମହାପାତ୍ରଙ୍କ ସୂଚନା ଅନୁଯାୟୀ, ସାଇଣ୍ଟିଫିକ୍ କଣ୍ଟ୍ରୋଲ୍ ରୁମ୍ ଜରିଆରେ ପୂରା ଫ୍ଲଡ ଲାଇଟ୍ ବ୍ୟବସ୍ଥାର ପରିଚାଳନା କରାଯିବ। ଫ୍ଲଡ ଲାଇଟରେ ଏକ ଡିଜିଟାଲ୍ ସିଙ୍କ୍ରୋନାଇଜ୍ ଲାଇଟ୍ ଡିସପ୍ଲେର ବ୍ୟବସ୍ଥା କରିବାକୁ ଓସିଏ ଯୋଜନା କରୁଛି।

୯ ମାସ ପରେ ପୁଣି ଥରେ ବାରବାଟୀରେ ଅନ୍ତର୍ଜାତୀୟ ମ୍ୟାଚ୍ ହେଉଥିବାରୁ କ୍ରୀଡ଼ାପ୍ରେମୀଙ୍କ ମଧ୍ୟରେ ଉତ୍ସାହ ଦେଖାଦେଇଛି। ଏହି ମ୍ୟାଚ୍ ପାଇଁ ଡିସେମ୍ବର ୫ ତାରିଖରୁ ସାଧାରଣ ଦର୍ଶକଙ୍କ ପାଇଁ ଟିକେଟ୍ ବିକ୍ରି ଆରମ୍ଭ ହେବ। ଓସିଏର ଏହି ପ୍ରସ୍ତୁତିକୁ ପୂର୍ବତନ କ୍ରିକେଟର ପବନ ଅଗ୍ରୱାଲ ପ୍ରଶଂସା କରିଛନ୍ତି। ଯେପରି କୌଣସି ତ୍ରୁଟି ନହୁଏ, ସେଥିପ୍ରତି କଡ଼ା ନଜର ରଖାଯାଇଛି।