ରାଞ୍ଚିରେ ଭାରତ-ଦକ୍ଷିଣ ଆଫ୍ରିକା ଦିନିକିଆ ମୁକାବିଲା

ରାଞ୍ଚି: ୨୦୨୩ ବିଶ୍ୱକପ୍ ଫାଇନାଲ୍ ହାରିବା ପରେ ଏସିଆ କପ୍ ଓ ଚାମ୍ପିଅନ୍ସ ଟ୍ରଫି ବିଜୟୀ ହୋଇଥିବା ଶକ୍ତିଶାଳୀ ଟିମ୍ ଇଣ୍ଡିଆ ଆଜି ଦକ୍ଷିଣ ଆଫ୍ରିକା ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ଶୃଙ୍ଖଳା ଆରମ୍ଭ କରୁଛି। ବିଶ୍ୱର ଏକ ନମ୍ବର ଦଳ ଭାରତ ଏହି ଶୃଙ୍ଖଳାରେ ବିଜୟୀ ହେବାକୁ ଆଶା ରଖିଥିବାବେଳେ, ଅଧିନାୟକ ଶୁଭମନ ଗିଲ୍ ଓ ଶ୍ରେୟସ ଆୟରଙ୍କ ଅନୁପସ୍ଥିତି ଦଳ ପାଇଁ ଶକ୍ତ ଧକ୍କା ହେବ ବୋଲି ଆଶଙ୍କା କରାଯାଉଛି। କେ.ଏଲ୍. ରାହୁଲ ଭାରତର ନେତୃତ୍ୱ ନେବେ।

ଭାରତୀୟ ଦଳର ଶକ୍ତି ଓ ଦୁର୍ବଳତା:  ରୋହିତ ଶର୍ମା ଓ ବିରାଟ କୋହଲିଙ୍କ ଉପସ୍ଥିତି ଭାରତର ଆତ୍ମବିଶ୍ୱାସ ବଢ଼ାଇବ। ଶେଷ ଦିନିକିଆରେ ରୋହିତ ଅପରାଜିତ ଶତକ ଓ କୋହଲି ଅପରାଜିତ ଅର୍ଦ୍ଧଶତକ ମାରିଥିଲେ। ଗିଲ୍ ନଥିବାରୁ ରୋହିତ ଶର୍ମାଙ୍କ ସହ ଯଶସ୍ୱୀ ଜୟସୱାଲ୍ ଇନିଂସ ଆରମ୍ଭ କରିପାରନ୍ତି। ୪ ନମ୍ବର ସ୍ଥାନ ପାଇଁ ଋତୁରାଜ ଗାଏକ୍‌ୱାଡ୍ ଓ ଋଷଭ ପନ୍ତ ମଧ୍ୟରେ ପ୍ରତିଦ୍ୱନ୍ଦ୍ୱିତା ରହିଛି। ରବୀନ୍ଦ୍ର ଜାଡ଼େଜା ଓ ୱାଶିଂଟନ୍ ସୁନ୍ଦର ସ୍ପିନ୍ ଅଲ୍‌ରାଉଣ୍ଡର ଦାୟିତ୍ୱ ତୁଲାଇବେ। ଅର୍ଶଦୀପ ସିଂହ, ହର୍ଷିତ ରାଣା ଓ ପ୍ରସିଦ୍ଧ କୃଷ୍ଣଙ୍କ ଉପରେ ପେସ୍ ବୋଲିଂ ଦାୟିତ୍ୱ ରହିବ। ଟେଷ୍ଟରେ ବିଫଳତା ସତ୍ତ୍ୱେ ନୀତୀଶ କୁମାର ରେଡ୍ଡୀଙ୍କୁ ସୁଯୋଗ ମିଳିପାରେ।

ଦକ୍ଷିଣ ଆଫ୍ରିକାକୁ କଦାପି ଦୁର୍ବଳ ଦଳ ବୋଲି ବିବେଚନା କରାଯାଇ ନପାରେ। ଟେଷ୍ଟ ଶୃଙ୍ଖଳା ବିଜୟ ସେମାନଙ୍କୁ ଉତ୍ସାହିତ କରିଛି। କାଗିସୋ ରବାଡାଙ୍କ ଅନୁପସ୍ଥିତି ସତ୍ତ୍ୱେ ଅଧିନାୟକ ତେମ୍ବା ବଭୁମା, ଐଡେନ୍ ମାର୍କରାମ ଓ କେଶବ ମହାରାଜଙ୍କ ପ୍ରତ୍ୟାବର୍ତ୍ତନ ଦଳର ଶକ୍ତି ବୃଦ୍ଧି କରିଛି।  ନିକଟରେ ଅବସର ନେଇ ଫେରିଥିବା କ୍ୱିଣ୍ଟନ୍ ଡି କକ୍ ଓପନ୍ କରିବେ। ମାର୍କୋ ୟାନ୍‌ସେନ୍, ନାନ୍ଦ୍ରେ ବର୍ଗର ଓ ଅଭିଜ୍ଞ ଲୁଙ୍ଗି ଏନ୍‌ଗିଡିଙ୍କ ଉପରେ ପେସ୍ ଆକ୍ରମଣର ଭାର ରହିବ।

ଧିମା ପିଚ୍ ରହିବାର ସମ୍ଭାବନା ଅଛି।  ଟସ୍ ଜିତି ପ୍ରଥମେ ବ୍ୟାଟିଂ କରିବା ଭଲ ବିକଳ୍ପ ହୋଇପାରେ, କିନ୍ତୁ କାକର (Dew) ଏହି ନିଷ୍ପତ୍ତିକୁ ପ୍ରଭାବିତ କରିପାରେ।  ଉଭୟ ଦଳ ଏପର୍ଯ୍ୟନ୍ତ ୧୦ଟି ଦ୍ୱିପାକ୍ଷିକ ଦିନିକିଆ ଶୃଙ୍ଖଳା ଖେଳିଥିବା ବେଳେ ସ୍କୋର୍ ୫-୫ରେ ବରାବର ରହିଛି। କ୍ରିକେଟ୍ ପ୍ରେମୀମାନେ ରୋହିତ ଓ କୋହଲିଙ୍କୁ ଦେଖିବାକୁ ଅପେକ୍ଷା କରିଛନ୍ତି ।