ହରାରେ (ଜିମ୍ବାୱେ): ୧୯ ବର୍ଷରୁ କମ୍ ପୁରୁଷ ବିଶ୍ୱକପ୍ ଫାଇନାଲରେ ଦେଖିବାକୁ ମିଳିଛି ବୈଭବ ସୂର୍ଯ୍ୟବଂଶୀଙ୍କ ବ୍ୟାଟର ପ୍ରଳୟଙ୍କରୀ ରୂପ। ଇଂଲଣ୍ଡ ବିପକ୍ଷ ହାଇ-ଭୋଲଟେଜ୍ ଫାଇନାଲରେ ବୈଭବଙ୍କ ପ୍ରଚଣ୍ଡ ପ୍ରହାରରେ ହରାରେ ସ୍ପୋର୍ଟ୍ସ କ୍ଲବର ଚତୁର୍ଦ୍ଦିଗରେ କେବଳ ଚୌକା ଓ ଛକାର ବର୍ଷା ଦେଖିବାକୁ ମିଳିଥିଲା। ତାଙ୍କର ଏହି ଐତିହାସିକ ଇନିଂସ ବଳରେ ଭାରତୀୟ ଦଳ ବିଶ୍ୱକପ୍ ବିଜୟ ଆଡ଼କୁ ଦୃଢ଼ ପଦକ୍ଷେପ ନେଇଛି। ମାତ୍ର ୮୦ଟି ବଲ୍‌ରୁ ୧୭୫ ରନ୍ କରି କ୍ରିକେଟ୍ ଦୁନିଆକୁ ଚକିତ କରିଛନ୍ତି ବୈଭବ। ମାତ୍ର ୫୫ଟି ବଲ୍‌ରେ ଶତକ ଅର୍ଜନ କରିବା ପରେ ପରବର୍ତ୍ତୀ ୫୦ ରନ୍ (୧୫୦ ରନ୍ ପୂରଣ) ପାଇଁ ସେ ମାତ୍ର ୧୬ଟି ବଲ୍ ନେଇଥିଲେ।  ନିଜ ଇନିଂସରେ ସେ ୧୫ଟି ଆକାଶଛୁଆଁ ଛକା ଏବଂ ୧୫ଟି ଚୌକା ମାରି ଇଂଲଣ୍ଡ ବୋଲରଙ୍କୁ ନିସ୍ତେଜ କରିଦେଇଥିଲେ।  ବୈଭବଙ୍କ ଆକ୍ରମଣାତ୍ମକ ବ୍ୟାଟିଂ ବଳରେ ଭାରତ ମାତ୍ର ୨୫ ଓଭରରେ ୨୫୦ ରନ୍ ପୂରଣ କରିବାରେ ସଫଳ ହୋଇଥିଲା। ଶେଷରେ ମ୍ୟାନି ଲମ୍ସଡେନଙ୍କ ବଲରେ ଥମାସ ରିଉଙ୍କୁ କ୍ୟାଚ୍ ଦେଇ ବୈଭବ ଆଉଟ୍ ହୋଇଥିଲେ ମଧ୍ୟ, ସେତେବେଳକୁ ଭାରତ ଏକ ବିଶାଳ ସ୍କୋର ଆଡ଼କୁ ଅଗ୍ରସର ହୋଇସାରିଥିଲା।

ଜିମ୍ବାୱେର ହରାରେ ସ୍ପୋର୍ଟ୍ସ କ୍ଲବରେ ଖେଳାଯାଉଥିବା ୧୯ ବର୍ଷରୁ କମ ପୁରୁଷ ବିଶ୍ୱକପ୍ ଫାଇନାଲରେ ଭାରତୀୟ ବ୍ୟାଟରଙ୍କ ଦେଖିବାକୁ ମିଳିଛି ରୁଦ୍ରରୂପ। ବିଶେଷ କରି ଯୁବ ସେନ୍ସେସନ୍ ବୈଭବ ସୂର୍ଯ୍ୟବଂଶୀଙ୍କ ପ୍ରଳୟଙ୍କରୀ ବ୍ୟାଟିଂ ବଳରେ ଭାରତ ନିର୍ଦ୍ଧାରିତ ୫୦ ଓଭରରେ ୯ ୱିକେଟ୍ ହରାଇ ୪୧୧ ରନ୍ର ଏକ ବିଶାଳ ସ୍କୋର ଛିଡ଼ା କରିଛି। ବିଶ୍ୱକପ୍ ଇତିହାସରେ କୌଣସି ଫାଇନାଲ ମ୍ୟାଚରେ ଏହା ସର୍ବୋଚ୍ଚ ସ୍କୋର।

ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାରତ ପାଇଁ ବୈଭବ ସୂର୍ଯ୍ୟବଂଶୀ ଆରମ୍ଭରୁ ହିଁ ଇଂଲଣ୍ଡ ବୋଲରଙ୍କ ଉପରେ ଚଢ଼ାଉ କରିଥିଲେ। ମାତ୍ର ୫୫ଟି ବଲରେ ଶତକ ପୂରଣ କରିବା ପରେ ସେ ଆହୁରି ଆକ୍ରମଣାତ୍ମକ ହୋଇଥିଲେ। ପରବର୍ତ୍ତୀ ୫୦ ରନ୍ (୧୫୦ ରନ୍ ପୂରଣ) ପାଇଁ ସେ ମାତ୍ର ୧୬ଟି ବଲ୍ ନେଇଥିଲେ। ଶେଷରେ ସେ ମାତ୍ର ୮୦ଟି ବଲରୁ ୧୭୫ ରନ୍ କରି ଆଉଟ୍ ହୋଇଥିଲେ। ନିଜର ଏହି ମାରାଥନ୍ ଇନିଂସରେ ସେ ୧୫ଟି ଛକା ଏବଂ ୧୫ଟି ଚୌକା ମାରିଥିଲେ।

ବୈଭବଙ୍କ ବ୍ୟତୀତ ଅଧିନାୟକ ଆୟୁଷ ମ୍ହାତ୍ରେ ମଧ୍ୟ ଶାଣିତ ବ୍ୟାଟିଂ କରି ୫୩ ରନ୍ର ଏକ ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ଅଭିଜ୍ଞାନ କୁଣ୍ଡୁ ୪୦ ରନ୍ ଏବଂ ଶେଷ ଭାଗରେ କନିଷ୍କ ଚୌହାନଙ୍କ ଅପରାଜିତ ୩୭ ରନ୍ ବଳରେ ଭାରତ ୪୦୦ ରନ୍ ଅତିକ୍ରମ କରିବାରେ ସଫଳ ହୋଇଥିଲା। ଇଂଲଣ୍ଡ ପକ୍ଷରୁ ମ୍ୟାନି ଲମ୍ସଡେନ ବୈଭବଙ୍କ ୱିକେଟ୍ ନେଇଥିଲେ ହେଁ ସେତେବେଳକୁ ଭାରତ ଏକ ମଜବୁତ୍ ସ୍ଥିତିରେ ପହଞ୍ଚି ସାରିଥିଲା।

୪୧୨ ରନର ଏହି ବିଶାଳ ଲକ୍ଷ୍ୟ ପିଛା କରିବା ଇଂଲଣ୍ଡ ପାଇଁ ଏକ କଠିନ ଆହ୍ୱାନ ସାବ୍ୟସ୍ତ ହେବ। ଭାରତ ମାତ୍ର ୨୫ ଓଭରରେ ୨୫୦ ରନ୍ ପୂରଣ କରି ନିଜର ଆଭିମୁଖ୍ୟ ସ୍ପଷ୍ଟ କରିଥିଲା। ଯଦି ଭାରତ ଏହି ମ୍ୟାଚ୍ ଜିତେ, ତେବେ ଏହା ଭାରତର ଷଷ୍ଠ U-19 ବିଶ୍ୱକପ୍ ଟାଇଟଲ୍ ହେବ।