ପଶ୍ଚିମବଙ୍ଗରେ ବଢ଼ୁଛି ଆଡେନୋ ଭାଇରସ ଆତଙ୍କ

କୋଲକାତା: ପଶ୍ଚିମବଙ୍ଗରେ ବଢ଼ୁଛି ଆଡେନୋ ଭାଇରସ ଆତଙ୍କ । ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବଢ଼ୁଥିବାବେଳେ ହସ୍ପିଟାଲରେ ରୋଗୀଙ୍କ ସଂଖ୍ୟା ବୃଦ୍ଧି ପାଉଛି । ଗତ ୯ ଦିନ ମଧ୍ୟରେ ୪୦ରୁ ଅଧିକ ଶିଶୁଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଗତ ୨ ସପ୍ତାହରେ ସର୍ବାଧିକ ଶିଶୁ ଏଥିରେ ଆକ୍ରାନ୍ତ ହୋଇଛନ୍ତି । ଆଡେନୋ ଭାଇରସକୁ ଦୃଷ୍ଟିରେ ରଖି ପଶ୍ଚିମବଙ୍ଗ ସରକାରଙ୍କ ତରଫରୁ ସବୁ ଡାକ୍ତରଖାନାକୁ ସତର୍କ କରାଯାଇଛି । ଆଲର୍ଟରେ ରହିବାକୁ ଶିଶୁ ବିଭାଗକୁ ନିର୍ଦ୍ଦେଶ ଦିଆଯାଇଛି । ଶିଶୁମାନଙ୍କ କ୍ଷେତ୍ରରେ ଭାଇରସ ଘାତକ ହେଉଥିବାରୁ ଚିନ୍ତା ବଢ଼ିଛି ।

ଏହି ଭୂତାଣୁ ଦ୍ବାରା ଆକ୍ରାନ୍ତ ହେଲେ ଥଣ୍ଡା, ଜ୍ବର ସହିତ ଗଳାରେ ପୀଡ଼ା ଦରଜ ରହୁଛି । ନିଶ୍ବାସ ନେବାରେ ମଧ୍ୟ କଷ୍ଟ ଅନୁଭବ ହେଉଛି । ଲକ୍ଷଣ ଦେଖାଗଲେ ତୁରନ୍ତ ଡାକ୍ତରଖାନା ଆସି ଡାକ୍ତରଙ୍କ ପରାମର୍ଶ ନେବାକୁ କୁହାଯାଇଛି । ଏହି ରୋଗ କାଶ କିମ୍ବା ଛିଙ୍କ ଦ୍ବାରା ମଧ୍ୟ ଅନ୍ୟକୁ ବ୍ୟାପିଥାଏ । ଏଣୁ ଶିଶୁମାନେ ମାସ୍କ ବ୍ୟବହାର କରିବାକୁ ପରାମର୍ଶ ଦିଆଯାଇଛି  ।