୨୦୪୭ ସୁଦ୍ଧା ଭାରତ ଏକ ବିକଶିତ ରାଷ୍ଟ୍ର ହେବ
ସଂସଦରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୪ ପାଇଁ କାମଚଳା ବଜେଟ ଉପସ୍ଥାପନ କରିଛନ୍ତି। ସେ କହିଛନ୍ତି ଆସନ୍ତା ୨୦୪୭ ସୁଦ୍ଧା ଭାରତ ଏକ ବିକଶିତ ରାଷ୍ଟ୍ର ହେବ। ଏହା ସହିତ ୨୦୧୪ରୁ ୨୦୨୪ ଗତ ୧୦ ବର୍ଷ ମଧ୍ୟରେ ଦେଶରେ ଭିତ୍ତିଭୂମି ବିକାଶ ଧାରା ଅବ୍ୟାହତ ରହିଛି। ଶକ୍ତି କ୍ଷେତ୍ରରେ ଭାରତର ଆତ୍ମନିର୍ଭରଶୀଳତା ବଢ଼ିଛି।
ଅର୍ଥମନ୍ତ୍ରୀ କହିଛନ୍ତି, ’ଗତ ୧୦ ବର୍ଷ ମଧ୍ୟରେ ଆମେ ସମସ୍ତଙ୍କ ପାଇଁ ଗୃହ, ପ୍ରତ୍ୟେକ ଘର ପାଇଁ ଜଳ, ରେକର୍ଡ ସମୟରେ ବ୍ୟାଙ୍କ ଆକାଉଣ୍ଟ ଭଳି କାର୍ଯ୍ୟ ସମାପ୍ତ କରିଛୁ। ୮୦ କୋଟି ଲୋକଙ୍କୁ ମାଗଣା ରାସନ ଦିଆଯାଇଛି। କୃଷକଙ୍କ ଉତ୍ପାଦ ପାଇଁ ସର୍ବନିମ୍ନ ସହାୟତା ମୂଲ୍ୟ ବୃଦ୍ଧି କରାଯାଇଥିଲା। ଉତ୍ସଗୁଡିକ ସ୍ବଚ୍ଛତା ସହିତ ବଣ୍ଟନ କରାଯାଇଛି। ଆମେ ଅସମାନତାକୁ ହଟାଇବାକୁ ଚେଷ୍ଟା କରିଛୁ ଯାହା ଦ୍ୱାରା ସାମାଜିକ ପରିବର୍ତ୍ତନ ଆସିପାରିବ। ପ୍ରଧାନମନ୍ତ୍ରୀଙ୍କ ଅନୁଯାୟୀ ଗରିବ, ମହିଳା, ଯୁବକ ଏବଂ କୃଷକ, ଏହି ଚାରୋଟି ଜାତି ଯାହା ଉପରେ ଆମର ଧ୍ୟାନ ରହିଛି। ସେମାନଙ୍କର ଆବଶ୍ୟକତା, ସେମାନଙ୍କର ଆକାଂକ୍ଷା ଆମ ପାଇଁ ଗୁରୁତ୍ୱପୂର୍ଣ୍ଣ ।
ଦେଶ ଏକ ନୂତନ ଉଦ୍ଦେଶ୍ୟ ଏବଂ ନୂତନ ଆଶା ପାଇଛି। ଜନସାଧାରଣ ପୁନର୍ବାର ଏକ ବିରାଟ ଆଦେଶ ସହିତ ସରକାରଙ୍କୁ ନିର୍ବାଚିତ କରିଥିଲେ। ଆମେ ଦ୍ୱିଗୁଣ ଆହ୍ବାନ ଗ୍ରହଣ କଲୁ ଏବଂ ସ୍ବକା ସାଥ, ସବକା ବିକାଶ ଏବଂ ସବକା ବିଶ୍ୱାସ ମନ୍ତ୍ର ସହିତ କାର୍ଯ୍ୟ କରୁଛୁ। ଆମେ ସାମାଜିକ ଏବଂ ଭୌଗୋଳିକ ଅନ୍ତର୍ଭୂକ୍ତ ସହିତ କାର୍ଯ୍ୟ କରୁଛୁ। ଆମର ଯୁବବର୍ଗଙ୍କ ପାଇଁ ଦେଶରେ ବର୍ତ୍ତମାନ ବହୁତ ବଡ଼ ଆକାଂକ୍ଷା ଏବଂ ଆଶା ରହିଛି।ଆସନ୍ତା ୫ ବର୍ଷରେ ଆଉ ୨ କୋଟି ପକ୍କା ଘର ଯୋଗାଇ ଦିଆଯିବ।’ ଆଜି ସଂସଦରେ ୨୦୨୪-୨୫ ଆର୍ଥିକ ବର୍ଷ ପାଇଁ କାମଚଳା ବଜେଟ ଆଗତ କରିବା ଅବସରରେ କେନ୍ଦ୍ର ଅର୍ଥ ମନ୍ତ୍ରୀ ନିର୍ମଳା ସୀତାରମଣ ଏହି କଥା କହିଛନ୍ତି।
ସେ କହିଛନ୍ତି, ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାରେ ଆଗାମୀ ୫ ବର୍ଷରେ ୨ କୋଟି ଘର ନିର୍ମାଣ କରିବାକୁ ଲକ୍ଷ୍ୟ ରଖାଯାଇଛି। ମଧ୍ୟବିତ୍ତଙ୍କ ପାଇଁ ନୂଆ ଘର ନିର୍ମାଣ ଯୋଜନା ଆରମ୍ଭ ହେବ। ଆଗାମୀ ଦିନରେ ୧ କୋଟି ଘରକୁ ୩ଶହ ୟୁନିଟ ମାଗଣା ବିଜୁଳି ଯୋଗାଣ ହେବ। ୯ରୁ ୧୪ ବର୍ଷର ବାଳିକାଙ୍କୁ ସର୍ଭାଇକାଲ କ୍ୟାନ୍ସର ଟିକା ଦିଆଯିବ।